eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
La Jenerozitad de Avigayl
Avigayl era una mujer ermoza i intelijente. Era kazada kon Naval, ke era muy riko. Afito ke kuando David , fuyendo del Rey Shaul, se estava refujiando en el dezierto, Naval estava arapando a sus mil kavros i tres mil kodreros en el Karmel.
David, kuando fue al koriente de esto, se adreso a diez de sus servidores:
«Vavosh ande Naval i saludaldolo en mi nombre, en ogurandole ‘Vidas largas a ti i a tu kaza! Sanedad buena a todos ke te apartiene!’I el mos kudyara».
Les respondio Naval:
«Ken es este David? De ke kale ke le de mi pan i mi agua, i la karne ke degoyi por mis servidores, i darlos a esta persona? Ken save de ande vino por aki?”
Kuando estas palavras fueron reportadas a David, David se ensanyo. Ordeno a 400 de sus soldados de tomar sus espadas i de adjuntarsen a el para atakar a Naval.
Uno de los servidores de Naval supo a esto, i avertiso a Avigayl, de lo ke estava para akantoser.
Al kontrario de Naval, ke era una persona de karakter difisil i otorativa, Avigayl, a parte ke era muy ermoza i era plazentera.
Imediamente, arekojo syen migas de pan, doz kueros yenos de vino, sinko kodreros, sinko sakos de granos tostados, syen gatos de pasa i dozyentos gatos de igo. Despues de averlos kargado sovre los aznos, salio al enkontro de David.
Kuando apersivio a David al lado de un ravino, Avigayl abasho de su azno, i saludo a David en abokandose kon su fasha mirando a la tierra. Se echo a sus piezes i le disho:
«Mi senyor, ke todo el pekado sea por mi solo. Permete a tu servidora de avlarte i oye lo ke tyene de kontar. Mi senyor, no des importansa a lo ke te izo este ombre visiozo. Naval es un bovo, i la bovedad esta syempre kon el. Portanto, yo so su servidora, i no tengo visto los mesajeros ke enbiates ande el».
Demando de David de transmeter las komanias a su djente i de pardonar a su marido. David fue de akordo i se retiro.
Kuando Avigayl se abolto a su kaza, topo a Naval borracheado. Despues ke vino en si, le konto sovre su enkontro kon David. En esto, Naval se endurmesio entero i despues de diez diyas se muryo.
Kuando David lo oyo a esto, se konvinsio ke la djustisia fue rendido. Enbiyo mesajeros en demandando de Avigayl de kazarse kon el.
Avigayl, pishin se suvyo a un azno, akompanyada por sinko de sus servidores, se fue ande David, i se kazo kon David.
Les nasyo un ijo yamado Hilab, i en syertos otros dokumentos konosido en tanto ke Daniel.
* * *
Avigayl es konsiderada kon Sara, Rahav i Ester, entre las kuatro mujeres de una ermozura eksepsionala del mundo. El Midrash le akorda i las propriadades de la saviduria i de la prediksyon
Portanto, el fakto ke Avigayl avia delivrado a David lo ke su marido avia refuzado, reprezente un akto de infedidelidad konjugal. De mismo, no seando ainde rey en esta perioda, David no teniya el dirito de ovligar a Naval de mantener a su djente.
Estos dos aspektos kontestan la ekitad de sus aksyon. Ay mizmo ke pensan ke Avigayl avia dezirado a David, i kon su komporto independente avia desidado su avenir.
David sera mas despues el Rey de Israel, ke unifiara a Israel en tanto ke una nasion, kon Yerushalayim su kapitala. Esto es probablamente la razon por lakuala, la Biblia no sulinya los defektos del komportamiento de Avigayl, i la parte de responsabilitad de David en esta epizoda.
—————————————–
Gad Nassi
