Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–

La Fidelidad de Rahav 

Kuando los ebreos salvados de Ayifto avian kampado en la oriya del Rio Yarden, djusto en frente de  la sivdad de Yeriho i se estavan preparando a traversarlo, sus shefe Yoshua mando dos de sus soldados para ke arekojgan informasiones sovre el terreno i sus armadas. Kuando estos arivaron a Yeriho, vinieron a la kaza de Rahav, al lado de las murayas de la sivdad i se kedaron ayi para pasar la noche.

Kuando el Rey de Yeriho fue informado de la prezensia de los soldados en la kaza de Rahav, le mando sus emisarios kon el orden de entregarlos, en avizandola ke son espiones. Portanto Rahav, los eskondio en el tejado de su kaza:

«Es verdad ke dos personas vinieron ande mi, ma no se de ande vinieron. I kuando seri la puerta de mi kaza en la obskuridad, eyas salieron ahuera. No se ande se hueron. Bushkaldolos presto para apaniarlos.»

Despues ke los emisarios partieron, Rahav se suvio al tejado:

«Ya se ke el Dio vos prometio a este payis, ke el espanto de mozotros se akaparo de vozotros, i ke todos los abitantes del payis se unisaron kontra vozotros. Supimos de ke manera el Dio seko las aguas de la Mar Kolorada kuando salitesh del Ayifto… Vuestro Dio es el Dio ke governa en los Sielos i aki abasho en la Tierra.»

En rekompansa por este akto i su promesa de guadrar esto todo en sekreto, los dos soldados de Yoshua djuraron ke su vida i ansi ke akeyas de todos los miembros de su familya seran eparnyadas kuando Yoshua iva konkistar el payis.

Kedaron de akordo ke despues ke toda su familya se arekojera en su kaza, Rahav pozara la kuedra kolorada kon la kuala los dos espiones se estavan prepaparando para arevatarsen por la ventana. Desde modo, la kaza de Rahav se apartara de las otras kazas durante el atako de los israelis, i se salvara.

Rahav les inkomendo:

«Vavosh i eskondevosh en las kolinas durante tres diyas, fina ke los soldados del Rey de Yeriho retornen i para ke no vos deskuvren. Despues puederash aboltar ande  vozotros«.

Los espiones le respondieron:

«Si alguno de tu famiya salira de tu kaza a la kaye, su sangre dependera de el, i mozotros no seramos kulpables. Portanto, si uno ozara a pozar su mano al kualakere persona ke sera kon ti en tu kaza, su sangre dependera de mozotros. I si reveleras muestro sekreto, mozotros no seramos kulpavles por el djuro ke mos izites djurar «.

Los espiones despues ke se aboltaron ande Yoshua, le kontaron todo lo ke avian visto i todo lo ke avian prometido a Rahav. En segito, los ebreos traversaron el Rio de Yarden para konkestar en primero a Yeriho.

Yeriho fue enteramente destruida. Sus abitantes, sus ombres ansi ke sus mujeres, sus mansevos ansi ke sus aedados, sus vakas ansi ke sus kodreros i sus aznos fueron pasados por la espada. Todos sus rikezas en plato i en oro, i sus ustensiles en bronzo i en fierro fueron adjustados a los trezoros del Dio.

I Yoshua ordeno a los dos espiones:

«Vavosh a la kaza de la putana ke vos eskondyo, i trayeldola aki, a eya, i a todo lo ke apartiene a eya asigun ke le djuratesh«.

I ansi fue. Kon la konkesta de Yeriho, Rahav kon toda su famiya, fueron salvadas i se adjustaron a la Kaza de Israel.

* * *

El Talmud rekonese ke Rahav era una putana. Asigun la leyenda, Rahav fue una de las mas ermozas mujeres de la istorya. Su nombre solo era kapache de eveyar el dezeo. A la edad de diez anyos se avia postituada, i no egzistia un prens o un monarko ke no avia tenido  atadijos kon eya. Pormo de esto, Rahav era muy buen informada de todo lo ke se pasava en Yeriho i ahuera de Yeriho.

Aun su pasado, Rahav es konsiderada komo el egzemplo de la Fey en Dio. Asigun la leyenda, despues de averse konvertido al Djudaismo, se kazo kon Yoshua, i fue la ansestra de ocho  profetos.  Entre  estos,  la Profetesa Hulda i

el Profeto Yermiyau.

————————————————————————————————————

Gad Nassi