eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
La Arogansa de Mihal
El Rey Shaul, despues ke se avia desidado de dar a Merav, su ija behora, a David, avia trokado de idea en kazandola kon Adriel.
Probablamente, este akto avia derivado del dezeo de Shaul de enrezyar su poder en developando sus atadijos kon personalitades infuentes.
Entretiempo, akontesio ke Mihal, la segunda ija del Rey Shaul se avia enamorado de David. Esto le plazio a Shaul. I se penso de si para si:
«Vo darle a Mihal para ke eya sea una trampa para el i ke los Pilishtis se vengan de el«.
I por una segunda vez prometio a David ke sera su yerno. Despues enbio a sus servidores ande David:
«Dizildole ke el me plaze muncho, i ke plazio a todos mis servidores. Kale ke sea mi yerno«.
I, David les respondio:
«Vos parese ke es koza chika de ser el yerno de un rey para una persona prove i sin fama komo mi?«
Shaul enbio de mueve a sus servidores ande David:
«Dizildole ke el Rey no kere regalos por este kazamiento, lo ke kere es solo syen prepusios de Pilishtis en sinyo de su vengansa de sus enemigos «.
Kon esto, Shaul avia esperado ke David iva kayer en las manos de los Pilishtis. David, de su parte se avia muncho gustado en pensando ke iva ser el yerno del Rey. Sin peryer tiempo, arekojo a sus soldados, mato a syen Pilishtis i trusho sus prepusios ande Shaul.
La leyenda rakonta de mizmo ke Mihal, antes de kazarse kon David, fue kazada kon Paltiel. I, al pareser este kazamiento no se avia konsumado.
Kuando Mihal estava kazada kon Paltiel, Avner, el komandante de la armada, avia mandado un avizo a David:
«Aken apartyene este payis? Aze una aliansa kon mi, i yo te dare todo mi apoyo para ke reynas sovre Israel entero«.
David, le respondyo:
«De akordo. Solo, kero una koza de ti. No te vas aparar delantre de mi sin ke traygas kon ti a Mihal, la ija de Shaul«.
Despues, David enbiyo sus mesajeres a Ishbaal, el ijo de Shaul:
«Dame atras mi mujer Mihal, ke me fue prometido al presyo de syen prepusios de Pilishtis«.
Mismo ke David se kazo despues kon Mihal, el aboresemiento de Shaul por David estava ainda bivo. Kuando Mihal lo avia avizado ke David estava hazino i enkamado, Shaul mando a sus soldados a la kaza de David para ke lo traygan i para pueder matarlo. En esto, Mihal metio un idolo de lana de kodrero a su kama por trampa, i izo fuir a David de la ventana.
Portanto, un otro evenemiento konsernando los atadijos entre Mihal i David es reportado en la Biblia.
Mihal se avia muncho endiniado kuando avia observado de su ventana a David kon el puevlo de Israel, alevantando el Arko de Aliansa i trayendolo a la kapitala, kuaji desmudo, baylando, saltando kon gritos de alegria i basho el sono de trompetas. Ansi, se avia ekspresado:
«Komo puede ser ke el Rey de Israel sea vistido de esta manera, desmudo delantre de las esklavas, i de una manera tan vulgara!»
David le respondio:
«Es delantre del Dio, ke me tiene eskojido al lugar de tu padre i de su kaza, por Prenso de Israel, el Puevlo del Dio, kon elkual estuve baylando. Me va arebashar i me va umiliar mas muncho en mis ojos, ma sera
konsiderado kon onor de la parte de las muchachas ke por eyas avlates«.
* * *
Mihal no trusho kreaturas al mundo. De este modo, la desendensia de Shaul kon akea de David no kontinuo. Esto fue konsiderado mas despues en tanto ke el kastigo divino a Mihal porke avia blamado a David.
Portanto, la Biblia no kontiene dingun komentario kritikando a Mihal sovre su komporto.
—————————————–
Gad Nassi
