La rubrika de Gad Nassi – Estorias de los tiempos biblikos: Israel Kontra Yuda

Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–

Israel Kontra Yuda

Ahaz, Rey de Yuda, avia refuzado de adjuntarse a la aliansa del Estado de Israel kon Aram en la Siria i los Pilishtis, kontra la poderoza Asiria.
Entonses, Pekah, Rey de Israel, kon Rezin, Rey de Aram, atakaron a Yuda, en matando mas de sien mil de sus moradores i el ijo de Ahaz. I muncho mas moradores de Yuda – ombres, mujeres, i kreaturas – fueron tomados en kaptividad i fueron deportados a Israel.
Portanto, Oded, un profeto del Dio en Israel, salio a sus kamino i deklamo a los viktoriozos:

«El Dio se ensanyo kontra Yuda, i dyo su puevlo en vuestras manos. Es ke keresh tener vuestros ermanos de Yuda komo vuestros esklavos? No tendriash i vozotros pekado kontra el Dio? Agora, eskucharash a las palavras del Dio i los mandarash atras a sus kazas.»

En esto, los dirijentes de Israel daron a vistir a los kaptivos, les dieron a komer, i los mandaron a sus payis, prokurando mizmo aznos para ke yeven a los ke estavan flakos. Los trusheron a Yeriho, en la Valeya de Yarden, i los entregaron a sus puevlo.

Kon esta gerra ke avia esbrochado en 733 AE, una partida de Yuda fue okupada por Israel i Aram. Rezin se aparejo a konkistar a Yerushalayim. Los Pilishtis se apropriaron del Negev i de la parte oksidental del payis en el Sud. Elat fue okupado por los Edomites.
Sovre la demanda de ayudo de Yuda, Tiglat-Pileser, el Rey de la Asiria, atako kon su armada a Aram i a Israel. Rezin abandono el siejo de Yerushalayim para pueder defender su proprio territorio. De mizmo ke Pekah, torno a Israel para salvarse.
Tiglat-Pilezer, despues de aver konkistado Damasko i matado a Rezin, empeso a invair a Israel. Pekah, se sometio a la Asiria, sin defenderse. Verso 738 AE, los abitantes del Norte de Israel i del Este del Yarden fueron kaptivados, deportados i dispersados en diferentes provinsias del Imperio asiriano.

El Estado de Israel peryo la meatad de su territorio. Pekah ke avia provokado esta katastrofa, fue matado verso 736 AE, en segito de una konspirasion.

Kon la viktoria de la Asiria, Ahaz, el Rey de Yuda, se avia rendido a Damasko para selebrarla. Vijito su templo i mando un mesaje a Uriya, el Rabino en Kapo del Bet Amikdash, ordenandole de instalar ayi un altar asigun lo ke avia visto en el templo asiriano de Damasko.

Ahaz empeso a ofreser sakrifisios a los dios asirianos. Tuvo mizmo el odasio de kemar su ijo para sakrifikarlo al dio Moloh. El lugar ande este sakrifisio fue konsumado, kontinuo a ser el sitio ande kontinuaron a kemar kreaturas.

La Asiria al lugar de ayudar al Estado de Yuda, asigun ke Ahaz lo avia esperado, se akaparo de las tierras de Yuda, de su puevlo i de sus rikezas. Yuda fue aservido a la Asiria i fue ovligado de pagarle tributos pezgados.

Por el Estado de Israel empeso un proseso de dekadansia fatal. Despues de una dekada, Samaria, la Kapitala, kayo en las manos de los Asirianos. Kon la deportasion de su puevlo, el reynado de los Diez Trivos se eradiko enteramente.

Dinguno no save el numero de sus viktimas, ni el nombre de sus deportados verso Ninova, i a las provinsias aleshadas de la Asiria komo
Halah, Habor, el Rio Gozan i las Montanyas de Medya.

—————————————–
Gad Nassi