eSefarad Noticias del Mundo Sefaradi
Hanna i sus Ijos
La estoria de Hanna i de sus syete ijos parese en el Segundo Livro de los Makabim. Es una estoria trajika de eroizmo ke avia akontesido antes mas de un siglo i medio de Muestra Era, kuando los Djudios en la Tierra de Israel se avian revoltado kontra la tirania de los Gregos
Despues ke fue arondjado del Ayifto por los Romanos, Antiohus Epifanes, el suzereno del Imperio seleseido kijo kalmar su sanyo en persekutando los Djudios ke bivian en la Tierra de Israel. Empeso a devastar a Yerushalayim, a maskrar los Djudios i renderlos en esklavaje. Una komunidad grega fue establisida en Yerushalayim, i Antiohus proklamo ke los Djudios devian de adoptar las kreyensyas i los uzos de los Gregos, de no observar el Shabat i las fiestas djudias, de no sirkonsizar a sus ijos i de meterles nombres gregos.
Los ke no se konformavan a estos ordenes fueron torturados i matados. El Templo de Yerushalayim fue poluado kon los idoles gregos, i fue yamado Zeus Olimpus. Antiohus defendio todo modo de sakrifisios al Dio, i sakrifio un puerko al dio Zeus en el altar del Templo.
Portanto, munchos Djudios estavan kontinuando en sekreto a inchir sus doveres asigun la Ley de Moshe. Entre estos, Hanna i sus syete ijos ke eran sirkonsizados, fueron deskuvridos por los Gregos, i fueron ekspozados al puevlo en aziendolos kaminar en parada en las kayes de Yerushalayim.
Kuando los ijos de Hanna fueron interojados i refuzaron de renunsiar al kumplimiento de los preseptos del Djudaismo, eyos fueron uno detras del otro torturados i egzekutidos. La leyenda rakonta ke kuando avia arivado el torno del ijo el mas mansevo, Hanna le avia demandado:
«I, kualo es tu desizion?»
Su ijo le respondio:
«Solo regreto de aver tanto asperado para eksprimir mi fidelidad a la Tora».
I a la fin Hanna fue torturada i egzekutida.
Asigun una version, Hanna se avia echado al fuego. El Midrash rakonta ke avia pedrido su razon i se avia echado de un tejado. Yosefus Flavius nota ke se avia kaido muerta enriva de los puerpos de sus ijos. De otra parte, las fuentes kristianas rakontan ke sus relikos i akeos de sus ijos, fueron enterrados en el sitio de una sinagoga en la sivdad de Antiohya, i ke esta sinagoga fue transformada mas despues en una eglisia.
La egzekusion en publiko de Hanna i de sus ijos fue uno de los motivos de la revolta de los Makabim kontra la represion grega. Esta revolta reprezenta en mizmo tiempo la lucha de un puevlo por la libertad relijioza.
Asigun se save, en Desembre 164 AE, kon la rekonkista del Templo por los Makabim, esta revolta se avia terminado por una viktoria.
* * *
La estoria de Hanna es uno de los egzemplos del rolo de la mujer en tiempos de kriza por la sovrebivensia de Israel.
La syetena noche de Hanuka koresponde al empesijo del mez de Tevet. Konosido en tanto ke Rosh Hodesh Tevet, este dia es i yamado Rosh Hodesh Banot – la Mueva Luna de las Ijas. En este dia, los padres de la famiya uzan dar regalos espesiales a sus ijas.
De mizmo, este dia es dedikado a las eroinas de muestra istoria. Se rakonta la estoria de Hanna i de sus syete ijos, i en la tadre, las mujeres se van a la sinagoga para resivir una bendision espesiala.
—————————————–
Gad Nassi
————————————————————————————————————————————————–
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
