eSefarad Noticias del Mundo Sefaradi
El Miraklo del Andjelo Rafael
Tobit apartenia al Trivo Naftali, ke fue deportado por los Asirianos. Era una persona onesta, ke observava los preseptos relijiozos. Despues ke arivaron a Ashur, el Rey de este payis avia egzekutido a munchos Djudios egzilados.
En teniendo kudyo de enterrarlos asigun la Ley Djudiya, Tobit avia metido en perikolo su alma en defiando el dekreto real de kemar a sus kadavres. Kuando los governores fueron informados de su komporto, Tobit fue obligado de eskonderse fina ke el muevo rey Esarhadon suve al trono i Ashikar, el suvrino de Tobit sea restorado de muevo en tanto ke el ministro del rey. De este modo, Tobit pudo kontinuar a observar las mitzvot de su relijion.
En uno de los dias, kuando Tobit estava aboltando de enterrar un kadavro abandonado, kayo durmiendo en la guerta de su kaza. Pasharos vorases ke abasharon del syelo abasharon a sus ojos i lo ensiegaron. En su detresa, Tobit se akodro ke avia emprestado en el pasado, diez pedasos de moneda en plato a uno de sus parientes en la sivdad de Rages en Media. Demando de su ijo Tobias, de reklamar a esta suma.
El mansevo salio al kamino akompanyado de un giyo. Kuando estavan pasando el Rio Tigris, el giyo le konsejo de apanyar un pishkado, i de guadrar su korason, su ligado i su safra. Despues arivaron a la sivdad de Ektabana en el payiz de Media, en esto, el giyo le disho a Tobias ke su paryente Reuel mora ayi, i ke tiene sola una ija, ke se yama Sara. I, adjusto:
«Sara se tiene kazado syete vezes, portanto kada uno de los novyos se murieron la noche de la boda, i asigun la Ley, seando tu paryente, Sara era destinada a ti, i no a un etranjero.
Para ke puedes aleshar a Ashmeday, el guerko ke mata a los novyos, kema el korason i el ligado del pishkado».
Tobias izo asigun lo ke le fue enkomendado, i reusho. Su eshuegro se sintio muy orozo de ver ke esta en vida, i alargo a los diyas de las festividades de la boda de syete a katorze diyas. Entretiempo, el giyo se fue a Rages, i trusho la suma de la devda, i todos endjuntos aboltaron ande Tobit, el padre de Tobias.
Kuando arivaron a Ninova, Tobias frego la safra del pishkado a los ojos de su padre, i esto le retorno la vista. Kuando, Tobit kijo pagar al giyo por sus servisios, se avero ke el giyo no era mas ke el Andjelo Rafael, uno de los syete andjelos del Dio, ke yevan las arogasiones de los umanos al Syelo.
Tobit era bastante aedado i era konsiente ke la fin de la sivdad de Ninova era serka. Por esto, enkomendo a su ijo de salir de esta sivdad i de irse a Media despues de su muerte. I, Tobias ajiso asigun su dezeo.
* * *
La leyenda de Tobit i de su ijo Tobias se referra a dos konseptos populares: el dover de mentener la puritad del puerpo de un muerto abandonado i el merito de kazarse kon un paryente.
Sus eroes apartienen a los desendientes de los diez tributos de Israel ke fueron deportados a Ashur durante el siglo VIII AE. De mizmo la leyenda konfirma siertas informasiones ke egzisten en el Talmud sovre la prosperitad de estos desendientes en el payiz de Media i en su entorno. De mizmo ke, durante el Egzilo de Babel, los Djudios avian sintido la responsibiltad de konformarsen a sus Ley i de konservar la kontinuitad de sus desendensia, en kazandosen entre eyos.
—————————————–
Gad Nassi
————————————————————————————————————————————————–
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
