eSefarad Noticias del Mundo Sefaradi
Esto fue en 1947, en el kuartier «Shefer Klein» ande morava, en el sud de Tel- Aviv. En akel tiempo sufrimos una «epidemia» de rovos i sakeo. Lo mas de los ladrones eran arabos de Yaffo i su derredor; indemas ke el kuartier abrasava a los sentros ande avia una grande populasion araba. La ozadiya de los ladrones aumentava de dia en dia mas. No pasava ni una noche ke no mos vijitavan los ladrones, mientras la polisia no kumpliya de nada su mision. La polisia de los inglezes ni ke topava de djusto de anular esta yaga.
La mayoria de este kuartier eran proves, i kualkier danyo en su propriedad (indemas kuando a vezes danyavan los ladrones a personas tambien) era muy doliente. En este maalé moravan djudios de todas partes de la diaspora, una miniatura de «reunion de los exilios»: djudios de Salonik, ke en Grecha, kon sus avla en ladino komo «kantandose», Ashkenazim de Polonia, djudyos de Turkiya, Bulgaria i Yugoslavia, djudios sefaradim. Tambien djudios Ashkenazis de Polonia, Rusia, Hungaria, Romania i afilu una famiya de goyim ke partenesia a la sekta de «Sobotnikos» de Rusia, ke biviya entre mozos kon paz. Avian djudios de los payizes islamikos: Irak, Iran, Nort Afrika, de Ejipto, Maroko, Tunisia i Libiya. Djudios de Kaukaso, Gurdjis, djudios de Buhara kon sus vesimientas de multikolor, i mas i mas.
Los miembros de las diferentes komunidades se avlavan entre eyos en el idioma de los payizes de ande vinieron. Ma la komunikasion entre todos, de todas las komunidades, fue una meskla de linguas la kual el ebreo era salpikado de yiddish i ladino, arabo-marokano, i buharali. En kurto: una «torre de Bavel». Malgrado todo esto, siempre se topavan los senderos a los korasones, i todos biviyan komo una famiya grande, i se ayudavan mutualmente. Es verdad, ke de vez en kuando akontesiya algun obstakolo en la komunikasion, i en konsekuensia okuriyan mal entendimientos, ma siempre se rezolvian por medios pasifikos. Las kriaturas eran un trankilizante partido, siendo ke eyos ya saviyan el ebreo, i eyos eran los ke davan a entender a sus parientes lo ke eksije una eksplikasion.
Los sefaradim orasionavan en kales djuntos kon djudios de los payizes arabos o de Kaukaso i Buhara, mientras los Ashkenazim se adjuntavan a tefila en unas chikas sinagogas, kada una kon su rabino.
La mijor komunikasion era entre las mujeres. Eyas uzavan a vijitar una a otra, ensenyavan i se ambezavan de parte a parte gizados i dulses, kozas de panaderia, tortas i manjares diferentes. Malgrado sus povre konosimiento de la lingua mutual, eyas logravan a komunikarsen; este fato aprovecho a todos.
Las kriaturas i los mansevikos se adjuntavan en grupos segun la edad, i pronto se uydureavan i topavan -komo uzamos a dizir- «una lingua komun».
Mis amigos i yo, ya eramos estonses adultos, edad de 16-17. Avian entre mozotros miembros en las organizasiones klandestinas komo Etsel, Lehi o Hagana, ma tambien algunos ke no pertenesian a ninguna organizasion.
Komo ya vos avia kontado, el problem de los ladronisios en el kuartier fue muy grave, i entonses, los moradores del maalé desidieron de formar unas guardias de noche, i ke pares pares van a patruliar i biklear. A mozotros, a los mansevikos, mos kargaron la tarea de funksionar komo konektores entre los varyos pares ke patruliavan.
Mi amigo Nissim i yo, ke siendo miembros de la Hagana ya tuvimos un sierto entrenamiento en «kombate kara a kara», tomimos un «palo godro» en la mano i salimos a kumplir muestro rolo.
En una de las noches, patruliando en el kuartier, oyimos en supito unos gritos. Korrimos a la direksion de los gritos, pasando a traves de los kurtijos ke entre las kazas, i ke vemos?
Vimos a Ushki, muestro vizino, orijinario de Turkiya, un djudio korpulento, bozarron i temerario, aferrando en sus manos a un ombre vestido de galabiya blanka, i dandole una buena haftona. Akel ombre de la galabiya, – entre komyendo los golpes- gritava, en ebreo, sin kedar: «Ani Yehudi!» («Yo so djudio!»). Ma muestro vizino no kedava de responderle kon grito ayinda mas fuerte: «djudio sos? Dunke, dime SHEMAH !. Dime SHEMAH !»
(Komo tal vez ya lo savesh, djudios ladino-avlantes no pronunsian bien las silabas gutural (komo en la letra «Ayin» en ebreo). Entonses, kuando kyeren dizir «Shema Yisrael» (i siendo ke no logran a aksentuar la «Ayin»), lo uzan a dizir komo «Shemahhh Yisrael»).
En kurto, kuando arrivimos estonses al sentro de la shena, vimos ke el tio Ushki estava «dando lenya» al vizino buharali, ke Nissim i yo ya lo konosiamos. Este buharali morava a la punta del kuartier, i al pareser salyo vestido kon su galabiya blanka a respirar un poko de aver fresko. Mozotros tratimos de frenar el arravdon de golpeadas, i gritimos: «Tio Ushki! Tio Ushki! Es djudio. Es el buharali ke mora al bodre del kuartier.»
Tio Ushki kedo de aharvalo, ma no kedo de murmurear kon su boz truenoza: «E, porke no dize el Shemahhhh?!»
Trezladado al ladino por Yehuda Hatsvi
Fuente: Ladinokomunita
