eSefarad Noticias del Mundo Sefaradi
Keridos amigos i amigas
En el Jewish News de esta semana «Carly Adno i Gareth Narunsky» anunsiaron la muerte de «Olga Horak» a la edad de 98 anios. 2 anyos antes eya avia dicho Ke guarden su memoria en AJN.
Horak era pasionada por la edukasion i por su lavoro komo voluntaria en el Museo Judio de Sydney. Eya lo avia kreado. Horak mos konto su istoria por ultima vez exaktamente una semana antes de su muerte, en frente de kriaturas ande estava su bis inyeta. Su mesaje era de «luchar kontra el antisemitismo mismo si uno era judio o no era». Su inyeto «Jonathan Sankey» avlando de eya a AJN. disho ke Horak segia kada dia las novedades asta el ultimo dia de su vida. Al ver djente kon banderas de Hamas i Isis marchando por las kayes, penso ke esto puedia pasarse mismo en la Australia. Pensava ke avia deshado todo atras. Dizia ke las leyes kontra la diskriminasion i el rasizmo no tenian la valor mismo el papel ande fueron eskritas.
Kuando Horak estava en su kaza la mayoria de las konversasiones eran sovre el Olokosto i sovre lo ke sinyifikava ser Judio. Horak al pasar por todo el orror, lo ke kijo azer fue de ir adelantre. Era una ke no tenia la mentalidad de una viktima. Vino a la Australia despues de pedrer a toda su famiya. sin dinero, i sin la asistensia del governo. En 3 mezes tuvo su fabrika i un business sin el soporte del governo i la komunidad.
Nacida en Bratislava en 1926 tenia 14 anyos kuando empeso la guerra en 1939. Asta 1942 se eskondio en una famiya ke fue traisionada, terminando en Auschwitz. Kuanto a su padre i avuela, fueron embiados direktamente a las Kamaretas de Gas.
En 1944-45 Horak kon su madre tuvieron ke marchar sienes de kilometros a Dresden. Despues fueron embiados de ayi a Belgen Belsen. Malgrado las hazinuras de tifus i difteria Horak sovrebivio al punto de ver la Liberasion de Bergen Belsen en 15 Avril 1945. Su madre murio en sus brasos el proximo dia.
En 1949 Horak i su marido.John vinieron a Sydney para empesar una vida mueva. Amo muncho al pais i dio todo atras a la komunidad. Por mas de 30 anyos konto su istoria a miles de djente de todas las profesiones. Avlo por los ke avian perdido sus bozes. En una letra del Premier de NSW «Chris Minns» estava eskrito ke Horak nunka seria olvidada por ser fuerte i resiliente komo una mujer Australiana. Avlo por su puevlo i kijo asegurarse ke las atrosidades de la Shoa nunka sean olvidadas. Dio su tiempo para avlar de sus experiensas i dar lisiones kontra el prejudisio i el rasizmo, Patrona de la «Asociasion de los Sovrebivientes Judios del Olokosto» SALUDES A TODOS.
—————————-
El Museo Judio esta situado en un edifisio ke antes era nomado «Maccabean Hall» konteniendo los nombres de soldados judios ke dieron sus vidas por la patria. Avia una seksion nomada «Jewish Welfare Society» yamada «La Ajensia Judia/Sohnut» ke se okupava de los imigrantes. Fueron eyos ke ayudaron a mi i a mi madre para venir a la Australia. Mos ayudaron por un tiempo en 1961.asta ke topi un empiego. Kon los anyos se kovertio a un museo i tengo la impresion ke se okupan tambien de los echos del Konsulato de Israel.
Tradusido por Simon Geron de Sydney
SALUDES A TODOS
Tradusido por Simon Geron de Sydney
Fuente: Ladinokomunita
