eSefarad Noticias del Mundo Sefaradi
Keridos amigos, vos empresento este artikolo sovre Mujeres judiyas ke se namoran de arabos moslimanos, se kazan i son ovligadas de bivir en kazales arabos, en el derredor de la otoridad palestinyana, deskonektadas i pedridas, muchos kavzos kon viyolensia , amargura i brutalidad.
Ay unos relijosos korajosos, ke entran a los kazales en la otoridad palestinyana, para salvar estas mujeres pedridas , i atornarlas al judaizmo. No es livyano, i ay poka reushida, ama kada una es un mundo entero. Esta kestion se aze mas komplikada kuando vienen kriyaturas…
Un diya se presento al buro (ufisio) de un pasaje entre israel i la otoridad palestinyana, un djoven de 18 anyos, i les konto a los empiegados, ke kiere ser soldado (askier) en el I.D.F (israeli defense forces). Ama sos arabo muslimano, le disheron. No disho el joven, yo so ijo de mujer djudiya, i a segun la ley, yo so djudyo.
Ijo de mujer judiya es djudyo, naturalmente, ke este sujeto suvio ande ofisiales altos.
La kuzendera (התופרת)
Una mujer ke se yama Roza morava en Yaffo en un apartamento vyejo en frente de su parientes. Era deshada i teniya un ijo de dies anyos. Era kuzendera i lavorava pezgado i muchas oras para se mantener su ijo. Mordi Turgeman estuvo lo mas de tiempo en la kaza de su nono i nona, i eyos lo engrandeseron.
Roza teniya vijinas muslemanas i avlava fluentamente Arabo.
Un diya se bozeo la yavadura de la puerta del apartamento de Roza i la vizina le trusho un fierero bueno ke veniya kon permit de un kazal serka de Genin. El fierero se yama Kayuf, i adovo bueno la puerta de Roza, i gano aparte de las paras, un kavejiko preto i savroso. En biviendo el kave echaron moabet en arabo i se konisieron.
Kayuf era persona buena, talentozo en su ofisio i teniya al kazal ke morava un atulie de lavores de fierro. Era bivdo i no teniya kriaturas.
Kuando se topava en Israel veniya kauf a vijitar a Roza, i kon el tiempo se izieron amigos buenos. Dizir la verdad Roza se enamoro de Kayuf; i el la kieriya mucho.
Un diya kayuf envito a Roza ke vea el derredo de su kaza, i la atulie, i ke agan un torno a Genin.
Roza aksepto i konto a su famiya ke se va ir a un paseo de unos kuantos dias.
Pasaron los diyas i Kayuf le arogo ke se kede mas, i le trusho regalos i prometas.Paso tiempo, i Roza insisto ke kyere atornar a Yafo, pero Kayuf no desho, le disho ke si se va fuir o va telefonar la va amatar a Roza i su ijo.
Roza entendio ke Kayuf tienia un lado malo en so karakter, i se topo menazada (מאויימת), del espanto se kedo en kayades kon el penserio de bushkar remedyo de atornar kon bueno.
Diyas pasaron I Roza kuziya fostanes I adovava la vestimienta de los kazalinos, I la konisieron komo la shastra judiya ke izo a Kayuf orozo.
Kayuf le merko una makina de kuzir I ropas ,achujas (algujas? -r) , alfinetes I filos.
Roza gano bueno I pago solo los materyales, I el resto kedo para eya.
Anyos pasaron , i Roza no topa komo atornar kon Buena manera.
Entremientes , Mordi su ijo , estuvo askier I se ijo ofisier. Siempre kotuneo a bushkar a su madre.
Un diya vido Roza ke Kayuf esta flosho i palido, lo tomo al ospital en Genin, i detras de dos oras ke aspero, le dieron el chaber preto ,ke Kayuf desho la vida Buena. Se muryo de strok de korason, I no pudieron salvar lo.
Roza kedo de un lado trista ke pedrio una persona ke amava, I de otro lado, oroza, ke va atornar a su famiya, a su ijo , I a los parientes.
Roza arivo kon una valijika al pasaje de kontrol entre Israel I las teritorias palestinyanas, presento sus dokumentos al askier en la ofisina. Le demand el empiegado: kualo tienes de bushkar en Israel detras de diez anyos en Genin?
Tengo un ijo i parientes en Yaffo.
Komo se yama tu ijo? Se yama Mordi Turgeman.
De sintir esto, salto el askier I kurio a la ventana I grito! Mordi, ven aki.
Mordi ke era el komandante del passaje entro I konosyo so madre. Se abrasaron los dos yorando un yoro de alegriya.
Vamos mama en kaza, nono i nona te estan asperando diyas i noches.
