LA KOMUNIDAD JUDIA EN MUEVA ZELANDA trezladado por Simon Geron

En el Jewish News de esta semana tenemos el artikolo presentado por «Juliet Moses» tratando de los Judios en Mueva Zelanda ke es una komunidad chika i muy orguyoza. En los últimos 2 anyos tuvo ke enfrentar sovre todo el apoyo de la Resolusión 2334 del ONU. En una komunidad tan chika i muy leshos del resto del mundo, sus miembros son bien aktivos i echan la kulpa a los politikos i la media, luchando kontra el antisemitismo i konstruyendo relasiones. Segun el Sensus de 2013, 6867 personas se identifikan komo Judios en una poblasion de 4.5 milyones.

Saludes a todos

La Resolusión 2334 toka no solamente a los Judios pero tambien a unos Kristianos. Toka sovre todo a los establesimientos en los territorios okupados i dize ke la Sivdad Vieja de Jerusalem inkluye al Barrio Judio i al Kotel Maaravi. Un otro kavzo fue la resolusión ke determina si se deve kondenar a Hamas i salio ke 2 tiersos votaron en kontra i la resolusión fue pasada. La Primera Ministra «Jacinda Ardern» despues de las matansinas en la frontiera de Gaza en Mayo 2018 kondeno el aktitud de meterse del lado solamente. [Ardern es Judia]. No se izo una deklarasión sovre el attako de la Sinagoga en Pittsburg.pero del otro lado los ministros del governo partisiparon en las festividades de Hanuka i Yom Ha Shoa. El ministro de defensa venia de enkontrarse kon Netanyahu en Israel i disho ke tenian buenas relasiones kon Mueva Zelanda i ke pensavan de mejorarlas en el terreno de ekonomía, seguridad i diplomasia. El Partido Nasional penso de reparar el danyo ke fue echo kon la Resolusión 2334. La sinagoga de Auckland invito a unos miembros del Grupo Nasional i del Labour a la sena de Shabat el anyo pasado. El Partido Green/Vedre akuzo a Israel del djenosidio i de apartheid i es el mas Anti-Israel. El boykote de Israel tuvo reushita i los aktivistas no desharon ke se mostré el Dokumentario de David Ben Gurion. Un otro egzemplo eran los papeles distribuidos en sivdades diferentes. En uno se dizía ke el Olokosto no tomo lugar. La Komunidad Musulmana ke es mas chika ke la de la Australia mostro un video en las meshkitas deklarando ke los Judios eran enemigos de los Musulmanes. Ke el dia de «QUDS» seria dar un golpe fuerte al tumor kanserozo ke es Israel el malo.

Kontra esto tomo lugar en la media el ekilibrio de un Blog. «Pro-Israel» Shalom Kiwi». Un otro inisiativo fue de transplantar arvoles en las eskolas en onor de los soldados ke kayeron en Beer Sheva. Formaron la «Institución Israel» en 2017 i la mayoría de sus miembros son Sionistos ke no son Judios.
Tienen el video «I am a Zionist». 600.000 personas lo vieron en los primeros 10 dias. Se estima ke 55% de los «Kiwis/Neo Zelandesos’ soportan a Israel en komparando kon los 15% ke son kontra Israel. Representa una boz fuerte i robusta. Egziste tambien la relasion entre los Judios i los otros grupos ande entran las iglesias i la Komunidad de India. El anyo pasado 100 de los Kristianos sionistas chuflaron el SHOFAR i selebraron el aniversario de Israel. Egziste tambien un lien kon los MAORIS ke tienen una afinidad kon el Puevlo Judío i miran a Israel komo inspirasion. Izieron la «WHAKAPANA» para ser perdonados por el akto de 2334. El Olokosto se komemoró en la Universidad «MARAE/Casa de encuentro’. El lavoro kontinua para asegurar ke la Judería enfrente unos retos i ke el pais sea tolerante i seguro komo fue tradisionalmente en esta komunidad chika i orguyoza.