eSefarad Noticias del Mundo Sefaradi
Mi bizvava, Perla Benun, nasida Menashe, nasio en Rodes en 1861.
Tenia 8 kriaturas – 5 ijas and 3 ijos. Kuatro de eyos emigraron a los Estados Unidos de Amerika i 3 fueron a Buenos Aires. La ochena, mi vava Reina, fue deportada en djulio 1944 kon su ijo. En total 1500 djudios fueron deportados de la izla de Rodes. Mi vava i mi tio se murieron en Auschwitz.
El marido de Perla, Samuel Benun, murio en el anyo 1918 i sus ijos en los Estados Unidos de Amerika la mandavan paras para su mantenimiento.
Perla tenia una personalidad fuerte i era una mujer buenacho. Kuando su yerno (mi papu, el marido de Reina) murio en el anyo 1922, eya desido de morar kon su ija para ayudarla a kriar sus sinko ijos. Perla era komo una segunda madre para estos ijos chikos.
Despues de unos kuantos anyos, Perla desido de vijitar sus ijas i ijos en l’Amerika. En primero se fue kon vapor a Buenos Aires, ande bivian tres de sus ijas kon sus maridos. Kedo aya unos kuantos mezes i despues eya viajo a Los Andjeles. Malorozamente su ijo bohor (Rahamin) aviya muerto de lukemia antes ke eya yegara. Rahamin teniya solo vente anyos de edad.
Kuando Perla torno a Rodes eya dono una korona de plata del Sefer Tora en memoria de su ijo Rahamin a la sinagoga Kahal Grande, onde su marido arrogava.
Abasho de la korona ay una inskripsion en ebreo ke dize
מתנה לק»ק גדול ממרת פירלה דה שמואל בן נון לזכרו של בנו רחמים הנ»פ ב28 אב תרע»ג
En muestro espanyol:
Regalo a Kahal Kadosh Grande de senyora Perla de Samuel Benun en memoria de su ijo Rahamin ke se murio en 28 Av 5673 (31 Agosto 1913)
Oy en dia esta korona, ke tiene mas de sien anyos, se topa en Los Andjeles kon Aron Hasson ke es bisnieto de Perla.
Antes un anyo, Aron kompro la korona en un mezat (auction) en Yerushalayim. En akel tiempo el no savia ke la korona era de su bizvava. Imajina su emosion kuando supo ke la korona era regalo de Perla!
En 1933 Perla desido de partir a Palestina. Komo munchos djudios en akel tiempo, keriya murir i ser enterrada en la Tierra Santa. Eya morava en el Beit Hazekenim Hasepharadi ke estava situado en 204 Rehov Yafo en Yerushalayim. Este lugar no egziste oy. En su plasa ay un otel – Lady Stern.
Perla era rezidente de esta kaza asta ke murio en el anyo 1946. Unos kuantos anyos antes, kuando su inyeto, Haim fue a Palestina a vijitar la, eya lo yevo a la Montanya de las Azeitunas (Monte de los Olivos) para mostrarlo el lugar ande se va estar enterrada. Eya avia merkado la fuesa (foso/pozo) i avia mandado azer su maseva kon la inskripsion munchos anyos antes ke muriera. Evidentemente la data de su muerte dainda no estava eskrita sovre la masava. Perla murio en 27 oktobre 1946 i fue enterrada en la parte Sefaradi del semeterio enriva de la Montanya de las Azeitunas en Yerushalayim.
En la parte de abasho de la maseva ay una inskripsion eskrita en memoria de su ija (Reina) i de su inyeto (Jaco). Esta inskripsion suplementaria fue eskrita kuando Perla supo lo ke les aviya akontesido en los kampos.
Entre las desendientes de Perla ay kuatro ijas ke tomaron el nombre de Perla – una de eyas es mi ermana.
Isaac Menashe
