LA ISTORIA DE «YVONNE ENGELMAN trezladado por Simon Geron

Era una kamareta de gas ke funsionava malo i fue esto ke le dio la okasión de fuir de ayi. Tenia el deseo de irse lo mas leshos posible. Fue esto ke trusho a un kontinente extranyo, al otro lado del mundo. Desde este dia bivio siempre en Maroubra un suburbio de Sydney al bodre de la mar. Oy en Lunes a la edad de 92 anyos se torna al Kampo de Konsentrasión de Auschwitz por la seremonia de 75 anyos desde la Liberasión del kampo. De los mas de 6 miliones de Judios ke fueron matados sistemátikamente 1.1 million murieron en Auschwitz. La Senyora Engelman sera una de las 3 Judias Australianas a tornar a este lugar de matansias en Polonia entre 200 otros sovrebivientes. Parese ke sera el ultimo anniversario porke kaji todos los sovrebivientes no estan mas en vida. Mas de 50 lideres del mundo vinieron a partisipar. Engelman estuvo ayi antes i fue siempre traumatizante los rekuerdos de este lugar ke dinguno puedia entenderlo. El Princhipe Charles de Ingletierra avlo del odio i la intoleransia contra Israel. El Presidente «Immanuel Macron» de Fransia disho ke el antisemitismo mostra su kara de muevo.

Engelman se engrandesio en «Dovne» en una aldea montanyosa de fermas ke antes formava parte de la Chekoslovakia. Era la sola kriatura i resivíendo toda la atension de la famiya. Kon la Okupasión Nazista basho Hitler en 1938 perdio su chikes alegre. Yevaron 2 vezes kada semana a su padre a la polisia i una vez al tornarse a kaza tenia sus dientes rotos. La famiya fue deportada al Geto Berehove en Ukraina en 1943. En unos mezes vinieron los ofisiales SS metiéndolos en los vagones de bestias i kon tanta djente no se puedia respirar. Engelman tenia dinguna idea ande los yevavan. Su madre le demando ke le prometa ke azería todo para kedarse en vida. Eya le prometio sin saver lo ke la asperava. Tenia 14 anyos. 2 noches despues se toparon en la entrada de Auschwitz i vieron la tabela «Arbeit Macht Frei/El lavoro libera a uno». Vino un mediko militar i metio a su madre a la siedra i los viejos a la derecha. Fue la ultima vez ke Engelman vido a su madre. Aprendio ke «Josef Mengele» azia experimentos medikales. Su grupo tenia la tarea de kitar todo de valor de los vestidos de las personas ke los mataron en la kamareta de gas. Oia la djente en la kamareta de gas ahogandosen i avia una golor de karne kemada viniendo del krematorio.
Kuando se aserkaron las Fuersas de los Aliados, los Nazistos se metieron a desmontar el Kampo de Konsentrasión. Engelman paresia a una eskeleta i tuvo ke azer la Marcha indo 60 kilometros kada dia. No tenia el pelo i todos paresían a zombis. A los ke no tenian la fuersa de kaminar los matavan. A la fin las metieron al lavoro en una fabrika de munisiones, metiendo oras arientro las bombas.

Engelman tenia 17 anyos kuando los Rusos liberaron el kampo en Mayo 1945. Estava sin moneda i sola. Basho el Sistem de Kota varios paises akseptavan de tomar a los orfelinos. Engelman metio su nombre en la lista de la Australia, el pais lo mas leshos de Evropa. Al yegar a Marseilles vido la mar ke nunka la avia visto antes. Despues de un viaje largo de mar se topo en Sydney i se instalo en el suburbio de Maroubra al bodre de la mar. Despues topo un empiego en djoyeria. Se enamoro de «John Engelman» ke venia tambien de la Chekoslovakia. Mas tarde en su vida yevo a las kriaturas al Museo del Olokosto en su mision de kontar su istoria para ke otros la sepan. Siendo konsiente ke los sovrebivientes del Olokosto no serian ayi mas, dize ke el Olokosto deve entrar en el kurrikulum de la edukasion nasional. Le dieron la Medalia de «Order of Australia’ por su lavoro.