"La importansa del Ladino en nuestros dias" por Selim Amado

Son munchos los Djudios Sefaradis ke tienen simpatia por el Ladino por razones nostaljikas. Se akodran de sus djenitores o de los anyos de chikes. Las nuevas jenerasyones no lo avlan mas, seyga por ke sus padres no les avlaron en esta lingua, seyga por ke el pays ande biven les impoza su lingua i kultura, komo oy en Israel i Turkiya. Lo mezmo paso dos jenerasyones antes entre los sefaradim ke emigraron a los payizes Evropeos o a las Amerikas. I los Nazis izyeron el krimen de matar a diezenas de miles de Ladinoavlantes, ansi ke somos bastante pokos a emplear esta lingua en nuestra vida de kada dia.

Ay tanbien siertos ke dizen : « pekado, el Ladino ya murio, todos los esforsos ke se azen son en vano». Es regretable, ma ay ke admitir ke estos tienen una vista muy superfisiala, mas i mas por ke para eyos el ladino es simplemente un jargon, una meskla de biervos ke avlaron los Djudios sefaradis en tiempos pasados, i ke meresen, maksimum, a kontar anekdotas. Eyos se gustan del ekzemplo klasiko : « no mos karishtreamos en muameles del hukumet, kiraladeyimos una araba »,etc. Los ke avlan I eskriven esta lengua oy mezmo, seyga en revistas komo (Aki Yerushalayim) o (El Amaneser), en grupos de korepondensia komo (Ladinokomunita) o (Sefaradi Muestro), o los enkuentros en el Salon del Ladino en Israel mostran ke el Ladino puede servir a tratar todo modo de temas, sin mesklar munchos biervos ekstrajeros, I no solo para kontar konsejikas de Djoha !.

No tiene ninguna importansia la diskusion si ay ke yamar a la lingua Ladino, o Judeo-Espaniol ( i ya savemos ke ay diskusiones fuertes entre linguistas, ke dizen ke ladino es la lingua de traduksion tekstos liturjikos del Ebreo kon la sintaksa de esta lingua, i el Djudeo-Espaniol, o Djudezmo, es la lingua avlada por los Djudios sefaradis, sovre baza del Kastelyano medieval o de los tiempos de la ekspulsion, ke kon tiempo adopto influensas de otras linguas, segun la jeografia de los payses ande se aresentaron los Djudios ekspulsados de Espania).

Otro aspekto a analizar es la diferensia ke uvo , durante siglos, en el uzo del Ladino segun el sekso, la edad, okupasion i klasa sosial. Los rabinos uzavan ekspresyones ebreas meskladas kon el Ladino por ke eyos eran los lideres relijyozos i uzavan ekspresyones sagradas i biervos en ebreo mas ke otros. Los ke atendieron eskolas ekstrajeras i komersantes ke tenian kontakto kon Evropa mesklavan biervos en Fransez i Italiano. La mayoria menos instruida mesklo biervos de la lingua del payis, por razones de kontakto de kada dia kon los otoktones, komo el Grego i el Turko.

La importansa del Ladino viene, mas i mas en nuestros dias, de ser el elemento ke reprezenta la kultura Djudia ke se formo despues la ekspulsion, i aze parte integrala de la historia i de la kultura de una grupo muy importante del puevlo Djudio, yamados los Sefaradim. El estudio del Ladino komo lingua, sintaksa, pronunsiasion, ekspresiones, nombres, alkunias, etc. es ainda mas importante oy, en tiempos de medios de komunikasion elektronikos . Porke esto es parte de una kultura a la ves Djudia i Ispanika, ke tiene sus raizes en la literatura Espaniola I Djudia, I konserva los karakteristikos de la vida Djudia de los largos siglos de prezensia Djudia en Espania, i nos da la historia de los sefaradis despues de la ekspulsion, sinko siglos atras.

Despues de 1492, el Ladino fue la lingua prinsipal de los Djudios sefaradis. Los egzilados reaksionaron a la ekspulsion de diferentes maneras : Munchos kerian krear de nuevo el « paradizo » ke desharon en Espanya (Benbassa), i esto no se podia azer sin la lingua a la kuala eran uzados. El Ladino tambien reprezentava las difikultades de las kualas sufrio una puevlasyon entera i por esto era menester de avlarlo.

Los primos tiempos estos Djudios se konsentraron en el konsepto de puede ser un dia retornar a la “patria”. Sus raizes Espanyolas los distinguia de otras puevlasiones en sus nuevo payis i eyos no kerian asimilarsen a sus nuevas komunidades, komo las komunidades en sivdades del Imperio Ottomano. Esto de una parte, ma la Tora i las eskriturias Djudias guiavan a los Djudios de adoptar el prinsipio « onde iras biendiziras », todo en no olvidando sus eksperiensa amarga en Espanya ansi ke el presio ke eyos pagaron por aversen tan asimilados a la vida en akel payis. El Ladino era sus propria lingua, la ke reprezentava sus erensia I el medio de komunikasyon entre eyos, kuando el « lashon hakodesh » – el Ebreo – era solo para orasyonar. Los sefaradis protejaron sus djudaismo en manteniendo la lingua, i djuntos kon la lingua sus kultura Espaniola-Djudia i mediterranea.

Toda la literatura en Ladino no aze mas ke mostrar la influensia i la interaksion entre eya i la kultura-folklor Espanyol medieval. Esta es la razon por la kuala los liguistas akademikos ispanikos siempre se interesan al Ladino. El arte i la arkitektura sefaradis mantienen la influensia de la ko-abitasyon kon los Muzulmanos durante munchos siglos en Espanya. Ekziste una kontribusion importante de los sefaradis a la literatura Espanyola. Cervantes, en su kuarten livro (La Galatea) da una konversasion de amor i ermozura entre « Tirsi » sensible i « Lenio » de korason duro i yelado, konversasion ke tiene karakter enteramente platonika. De mezmo en la shena « Marcela » del (Don Quijote ) ke es inspirada de “los Dialogos de Amor” del autor sefaradi Leon Hebreo.

No ay duda ke los Djudios sefaradis son de karakter mediteraneo, sus folklor i sus gizado es bazado a munchos legumbres i alzete oliva kon pokos kondimentos. Munchas komidas i dulses guadraron sus nombres kastelianos.

Visto ke los ekspulsados de Espanya se instalaron en varios payizes, akeyos del Imperio Otomano en los Balkanes i mediano oriente, asta siertos payizes Evropeos I la Afrika del norte, los avlantes del Ladino ya no uzavan kuaje la misma lingua. Las divizyones i separasyones jeografikas krearon dos grupos sentrales i la lengua se dezvelopo de forma diferente: en la Afrika del Norte, la Haketiya kon la influensia del Arabo, i el Djudeo-Espanyol, kon influensa del Fransez, Italiano, Grego i sovre todo Turko. En las Amerikas Latinas de avla Espanyola el Ladino no podia mantenerse, ma no ay duda ke sirvio a munchos konversos (Kripto-Judios) de guadrar sus identidad Judia.

Verdad es ke el Ladino esta avlado oy por muy pokos, i ke no se va transmitir de jenerasion en jenerasyon. Kontrariamente al Yiddish de los Eskenazis, ke entre eyos munchos lo tiendran komo lingua maternal munchas otras jenerasiones, mozotros Sefaradim no tenemos el privilejio de antes, ke era “Ladino de la fasha asta la mortaja.”

Si mezmo el Ladino no va servir mas de lingua maternal, komo podremos estudiar nuestro pasado sin embezar esta lingua, konoserla, i no solo kon los karakteres latinos segun la eskrivimos oy, ma kon los karakteres ebreos i la eskrituria kursiva yamada soletreo. I esto se esta azyendo en las universidades – i no solo en Israel. El estudiar, embezar i investigar la kultura del Djudaismo Sefaradi, por seguro en empesando de la lingua, sierven para no efasar un pasado muy importante de la historia del puevlo Djudio.

Selim Amado
10 Oct 2012