eSefarad Noticias del Mundo Sefaradi
Ver todos los artículos de esta sección
Un viaje a la Tierra Santa
Kontado por Yehuda Hatsvi
Esto paso en 1934. Un grupo de algunos 50 yehidim de una kehila en Salonik desidyeron de viajar por ver la tierra santa.
Merkaron bilyetos para «Chicherin», un vapor ruso ke viajava entre los portos de Salonik i Haifa, i yevava emigrantes djidyos al porto de Haifa en Palestina.
Las kondisyones en este vapor no eran tan komodas; ma, los yehidim bushkaron i toparon ke uno de los lavorantes en este vapor era Grego.
Avlaron kon este kristyaniko, ke le van a pagar tantos drahmes, i ke el se okupara de servirlos demaziya a lo tanto posivle.
De verdad, ke durante todo el viaje, Yorgo (ansi se yamava) los miro a todos yehidim «komo al puerpo del rey», i pasaron todos un viaje muy plaziente.
En arrivando a Haifa, se apozo Yorgo a la punta de la rampa del vapor, asperando kon la alma akorada ke le van a pagar lo ke kedaron de akodro, i tal vez tambien le daran los yehidim kada uno algunos drahmes «Pour Boire», bakshish, «tip»……Nada!
Abasharon todos, uno detras del otro, le disheron «mersi»,»efharisto» i «teshekur ederim», ma nada de moneda/para.
El ultimo de los yehidim abasho el Rabino kon una buena bolsa de dinero en la mano. Se la entrego a Yorgo i le disho:
– «Mil mersis por tu servisyo! Aki tyenes tu salaryo, i tambien, aki, kada uno de mozotros te regalo ayinda mas hrimata/dinero!»
Yorgo estuvo muy emosionado, i el yoro ya lo teniya a la punta de la nariz.
– «Mira, sinyor Rabino!» disho Yorgo, «Yo so kristyano, ma kiero ke sepas ke nunka no kreyi a lo ke dizen la djente, o el papas, ke los judyos mataron a Hristo. No lo kreo!
Ma, ke le kitaron la alma, si. Esto si. Ya lo kreo! !!»
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
