eSefarad Noticias del Mundo Sefaradi
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, kada mes va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
«Selihot !»
Keridos amigos,
La kostumbre de los sefaradim es de levantar durante 40 dias muy temprano de la maniana desde el empesijo del mez ebreo de Elul i resitar i kantar los piyutim de las Selihot.
Muestros ermanos Ashkenazim lo azen kon demaziada «livyanez». Por enshemplo, oganyo empesaran las selihot en dia de alhad (el 1 de septembre 2013).
El piyut ke empesa muestras selihot se yama (en ebreo): «Kamti be-Ashmoret», eskrito por el poeta Rabi Moshe Ibn Ezra, nasido en Granada (1055-1140).
Moshe Ibn Ezra eskrivio (en ebreo, espanyol, i en arabo) muchos kantes de amor, natura i pasatiempo, ma tambien piyutim relijiozos ke entraron en muestras livros de orasiones, i ke se kantan asta oy dia.
Sus admiradores lo onoravan kon el sovrenombre «Salah» (por dezirlo asi, en ebreo, «el eskritor de Selihot»).
Me aze akodrar ke kuando mos ambezaron este fato en la eskola primaria (en Tel Aviv), demandi el permiso a dezir en la klasa, ke …de punto de vista de la lingua no es deltodo korrekto, porke «salah» en ebreo sinyifika solamente «perdonador». (la unika vez ke aparese esta palavra en la Biblia, es en Tehilim 86, 5).
Dunke, dishe, en mi umilde opinion, los ke «inventaron» este muevo sentido de la palavra, al pareser lo izieron kon una sierta asosiasion al nombre (o titolo) «Salah» ke en la lengua araba. (komo, por enshemplo, akel Salah el din).
Mi maestro me eskucho bien, enkojo sus ombros, sin ninguna otra remarka, i me disho: «asentate»…
Tornaremos agora en serio al piyut, ke me atrevi aki traduizir al judeoespanyol, su primera estrofa:
«»»Me alevanti en la madrugada
a atorgar por mis pekados,
i mi alma empretesida de mi tanta maldad.
Apiadate de Tu kongregasion,
revanyo de Tu apasentamiento.
Venturozos los ke moran en Tu kaza,
eyos te alavaran siempre.»»
***
Aki podesh eskuchar unas kuantas versiones del piyut: al uzo de Turkiya, Salonik i Yerushalayim.
Yehuda Hatsvi
Erets Yisrael
Para Ladinokomunita
