eSefarad Noticias del Mundo Sefaradi
Ver todos los artículos de esta sección
Buenos Dias,
Oy, temprano en la maniana, me levanti de la kama, i komo mi uzo de siempre, echi una mirada a la ventana grande de enfrente, dando a la parte del oriente.
No se pudo ver nada a travez del djam de lo ke pasa afuera. Todo el mundo estava kuvierto kon una derusha/nievla espesa.
Me izo akodrar de una manianada semejante en los dias de mi chikes: “Nuves i viento, ma luvia no ay”, komo eskrive en Mishle, kapitolo 25.
Mueve ombres (i yo tambien, un ninio de 9 anyos) estavan en el Kal del kuartier, esperando ke venga el diezen ombre para kumplir el Minian.
El Shamash salyo afuera a ver si se topa algun buen judio en la kaye, i talvez kombidarlo a la Tefila.
I na, ke arres del kurtijo de la Kehila vido el Shamash a dos mansevos, konosidos en el kuartier komo delikuentes, fumando tutun/un tobako preto.
Yene, se aserko i les disho:
– “Mos mankan uno o dos ombres para empesar la Tefila, i tenemos de rogar por luvyas tambien. Ya paso un mez despues de Hanuka i ayinda no vemos venir la beraha”.
Los dos mansevikos empesraon a riyirsen.
– “I por zehut muestro va venir la luvya? Ya mos konoses de kuando. No?”
El Shamash travo un poko de koraje, i les disho:
– “Mirando aki. El Dio ya aviya trayido el deluvio (el Mabul) sovre la mala djente de Sedom i Amora. Entonses, por kavza de vozotros dos, ya mos akontentamos kon una buena luvia”.
En diziendo esto, el Shamash, abolto presto, i entro al Kal.
Fue una maraviya de ver a los dos mansevikos bezando la Mezuza en entrando i eyos kon el.
Salud i vida!
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
