eSefarad Noticias del Mundo Sefaradi
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, kada mes va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita 
Kuentos al enkontro de 9 de Av
Segun muestra tradision, la data de Tish’a beAv fue una data fatal: El primer Bet-Mikdash, i el segundo Bet Mikdash tambien, fuerron derrokados, por mano de muestros enemigos, en este propio dia amargo.
El dezastre fue ayinda mas grave porke en estos dos evenimientos piedrimos muestra independensia politika, i empesimos una epoka larga de Galut (eksilo).
En el Talmud (en Masehet Sanhedrin) ay un kuento sovre Nevuhadnetsar, rey de Babilonia (antes 2600 anyos) ke mando a Nevuzaradan, el komandante de la armada, ekipamento militar para el asedio sovre Yerushalayim.
Entre otros, 300 mulas kargadas kon achas (shhuelas) grandes para derrokar las murayas de la sivdad. 
Los soldados de Nevuzaradan trataron azerlo kon toda fuersa, ma todas las achas se rompieron todas frente las paredes solidas i fuertes.
Uno de estos soldados frustrados ke se le rompio la acha, aharvo kon el mango de madero sovre la puerta grande de la muraya. Definitivamente raro, ma la puerta se derroto i kayo, i los soldados babilonikos desbrocharon brutalnente adientro de la sivdad de Yerushalayim…
En otro livro (Yalkut Shimoni) mos konta Ribi Hanina Bar-Papa ke kuando kreo el Santo Bendicho-El al metal fierro, empesaron todos los arvoles del kampo a temblar del espanto.
Ma, el Dio les disho a los arvoles:
– «Ninguno de vozotros ke no entre adienro del fierro, i ansi ninguno de vozotros sera danyado o ferido».
Vos digo la verdad, ke en la primera vez ke meldi esta fraza, aze muchos anyos, no la entendi por entero. Ma, en otra vanda, en otra konseja ayinda mas imajinaria, mos kontan ke fue la acha mizma la ke avlo i afalago a los arvoles.
Ansi disho la acha:
– «No tengash miedo de un pedasho de fierro inutil komo mi.
El peligro para vozotros es solamente kuando uno de vozotros (pedaso de arvol/madero/lenyo) entra en haveransa kon mi.
Djuntos -acha de fierro kon mango de madero- tenemos el poder de destruksion»…
Asta aki la konseja.
***
Yo tengo la feuzia ke muestros enemigos (sean fuertes afilu komo el fierro) no lograran nunka vensermos si no vienen algunos lenyos de Israel i les dan kualker apoyo.
Yehuda Hatsvi
Erets Yisrael
Para Ladinokomunita
