eSefarad Noticias del Mundo Sefaradi
Ver todos los artículos de esta sección
El leon i el lovo
Kontado por Yehuda Hatsvi
En un dia kayente de djulio, el leon, el rey del boske, estava arrimado basho de un arvole, gozando el freskor de la solombra.
En subito se le echo de atras un lovo, i lo mudreo al leon de buena manera.
El leon, kon su furia, kijo matar a lovo, ma el lovo empeso a rogar por su vida:
Perdoname, sinyos leon, perdoname!!
Siendo ke vine de atras, no vide tu kavesa i tu krino ermozo, i me paresites un perro grande asentado.
Perdoname, por favor !
– «Mira» -repondyo el leon- «me kavzates una negra yara/erida/ferida en la pierna, ke me duele mucho. Ma, ven ande mi otros tres mezes, i veremos si me kedo alguna sikatriz.
Vate, vate agora
Ansina fue ke a la salida del Moed de Sukot vino el love ande el leon i se prezento a djuzgo.
El leon, egaminando su pierna, le disho al lovo:
– «Esta bueno. Lo ke veo es ke la yara/erida ya se kuro enteramente…
…Ma, akeyo ke me dishites ke asemejo a un PERRO, esto NO me se va para abasho !!»
(Me parese ke el peskueso del lovo no kedo sano despues del mudrisko del leon…)
Pasan, amahan, kuchiyadas, ma no palavradas.
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
