eSefarad Noticias del Mundo Sefaradi
Ver todos los artículos de esta sección
Keridos amigos,
Me permeto konsejarvos a ver los videos ke mos prepara Benni Aguado, i eskuchar los kuentos ke mos konta.
Me plazio el titolo “Kuentos sefaradis” del video “Djoha i los sesh aznos”, eskrito en letras arabas, segun se uzava en el Imperio Otomano, antes ke pasaron a uzar letras latinas a la orden de Kemal Pasha Ataturk.
El ladino de Benni es fluente i savrozo, i su diksion es muy klara; vale la pena oyirlo.
Un otro video ke mos avia embiyado Benni, fue un kuento sovre Rabi Tarfon, un savio de la epoka del Talmud. Muy interesante.
Ayi, el titolo “kuentos” fue prezentado en letras de solitreo, la eskritura ke se uzava durante jenerasiones entre rabinos, i la djente en jeneral, sefaradim.
Me namoro del modo sefaradi de avlar en entrensando e vez en kuando algun refran kon moral i saviduria de la vida.
Ma, no todos todos refranes me agradan. Ay afilu un proverbio ke lo topo totalmente yerrado.
Aki lo tenesh: «Refran mentirozo no ay!»
Ay otros dos refranes ke desidi de no uzar mas, porke ofenden a la metad del puevlo: a las mujeres en jeneral, inkluye a mi mujer i a mi ija:
1. «Suve eskalon toma haver, abasha eskalon toma mujer»
2. «El meoyo de la mujer es poko, el ke no la siente es loko».
A propo, el kontrario mos dizen muestros savios en el Telmud (Masehet Nida 45, 2): «el Santo-Bendicho-El, le dyo a la mujer mas intelijensia ke al ombre».
De aki vengo a kontarvos una kurta anekdota:
Francisco, mas konosido komo Pancho, era uno de los abitantes de la sivdad de Makeda (Maceda), sivdad muy renomada, en la Edad Media, por sus savios i seheludos.
Un dia de sol kemador, en el mez de Julio, salio Pancho al merkado, i se merko un «revanyo» de siete burros/aznos.
No se ke menester teniya Pancho de merkar siete aznos, ma no importa.
Estonses, Pancho se monto sovre uno de los aznos asta su kaza.
Kuando yego, disho a su mujer:
– «Merki siete aznos, ma yo veo agora solo shesh!»
Le disho la mujer: «I yo veo – ocho!»
Yehuda Hatsvi
Israel
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
