eSefarad Noticias del Mundo Sefaradi
Ver todos los artículos de esta sección
Agua fria
Muestras madres diziyan por alguno ke era haragan, ke «no mete manos en agua fria». Ma, no por esto vos kiero kontar oy.
Me demando: Puede agua fria alimpyar los chinis/los platos? Esto es por todos mis amigos ke tyenen myedo de mikrobes, i estan en kuidado si agua fria puede alimpyar bueno los platos. Aze mucho tiempo, un amigo mio me avia enbiyado por mail esta istoria (en ingles).
Sin saver el nombre del autor, al pareser anonimo, me atrevi a traduizirlo al judeoespanyol:
John, ke agora bive en los Estados Unidos, se fue a vijitar a su nono/avuelo, ke ya tiniya 90 anyos de edad, i bivia en un kazal muy leshano i abandonado en Mexico.
Despues ke paso una buena tadrada, echando moabet kon su nono, a la manyana empeso el nono de John aprontar el dezayuno kon kezo, guevos i un toast.
De toda manera, John apersevio ke una migita de pan estava apegada en el chini, i entonses le demando a su nono:
– «Estos platos son limpios?»
Su avuelo le respondio:
– «Estan limpios a tanto ke agua fria alkansa a limpiarlos. Tu, ijo, mira tu echo i kome. Buen apetito!».
En la mediodia, el viejo apronto hamburgeres. Una vez mas, John estava preokupado sovre los platos, ke a los kenares ayinda se viya una pista seka de guevo.
El, otra vez, demando a su nono:
– «Estos platos estan limpios» ?
El viejo ni ke abolto su mirada, i le disho: – «Ya te lo dishe antes, kerido mio. Estos chinis estan limpios a tanto ke agua fria puede alimpyarlos. Agora tu no kuides. No kero sintir mas otra palavra por esto».
Despues de mediodia, John keriya irse a vijitar en un kazal serka de aya.
En salyendo de kaza, el perro de su avuelo empeso a bramar, i no lo deshava pasar.
John, echo un grito, i disho:
– «Nono, el perro tuyo no me esta deshando pasar i yegar al otomobil mio.»
El viejo ke estava mirando kon mucha atansion a un djugo de pelota (football) en la televizion, ni ke abolto su mirada a ver ke pasa, ma echo kon ravia un grito-de-los-gritos:
– “AGUAFRIA, basta! Kayadez! Ven aki allado de mi !”
Yehuda Hatsvi
Erets Yisrael
————————————————
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
