eSefarad Noticias del Mundo Sefaradi
Ver todos los artículos de esta sección
Antes dos anyos, me regalaron un livro en ebreo, yamado «Ivri Anohi»,biografia muy interesante sovre la vida i las aktividades de Avraham Recanati, uno de los sovresalientes lideres sionistas en Salonik en el siglo pasado. El autor de este livro konsideravle, es el Dr. Yitzhak Recanati, el nieto de Avraham.
Antes de todo, me fasino el titolo del livro («Ivri anohi»). Estas mizmas, fueron las palavras de Yona el profeta: «Yo so ebreo, i temo a Adonay, Dio de los sielos, ke izo la mar i lo seko».
Segun mi breve konosimiento personal kon el Sr. Avraham Recanati, en el anyo 1967, puedo atestiguar, ke estas palavras del profeta, lo deskriven a Avraham, el lider sionista, tal i kual.
Avraham Recanati se engrandesio en un ogar, en una kaza, ke su interior adornado kon amor a la relijion i la tradision de muestra nasion, kon sentimientos fondos de desfilo a Erets-Yisrael i Yerushalayim.
El siglo 19, ke al enkontro de su fin nasio Avraham Recanati, fue muy riko en dezvelopamiento ekonomiko i en industrializasion enorme. De la otra parte, avian muchos sentros de konflikto: En 1877 desbrocho la gerra entre el Imperio Otomano i el Imperio Ruso. El rezultado de esta gerra fue, una retirada, kaje kompleta, de los otomanos de toda Evropa.
En el mizmo tiempo, en el siglo 19, los estudios i la edukasion tradisionala en el Imperio Otomano sufrieron una kriza. El nivel de los maestros fue, jeneralmente, muy povre (i tambien sus salarios eran bashos).
Muchos de los lideres judios en Evropa se sintieron ovligados a entremetersen en el problema de las komunidades en el Imperio Otomano, i ayudarles a adelantar la edukasion, asi ke sea mas efektiva, para apoyar a los elevos proves de estudiar bien, i obtener kalifikasion mijor para la vida. El Sir Moshe Montefiore, ya en 1840, konsejo azer unas reformas en el system de la edukasion en todo el Imperio, i ensenyar la lengua turka en las eskolas.
Ansi empeso en 1854 en Istanbul la primera eskola judia en la kual los estudios inkluyeron linguas ajenas, aparte del ebreo i del judeoespanyol. Despues de tiempo se avrieron eskolas semejantes en Izmir, i en Yerushalayim.
En Salonik (en 1859) trato el Dr. Moiz Alatini de estabeleser una eskola kon muevos metodos de ensenyansa. Ma, no reusho tanto. Es solamente en 1880 ke empeso un esforso mas, esta vez kon el Dr. Moshe Ottolenghi de Italia, para reabilitar a la eskola yamada «Talmud Tora». De ayi kresyeron en Salonik mas eskolas modernas.
Avraham Recanati, en 1904, a la edad de 16 anyos ya empeso a bushkar kaminos para adelantar al sionizmo en su sivdad, Salonik. Sus artikolos ya fueron publikados en los jurnales El Avenir i La Esperansa.
Desde 1907, komensaron a estabelesersen en la sivdad, organizasiones sionistas, tratando del re-nasimiento del nasionalizmo judio. Avraham fue miembro en «Kadima» i en Bene- Sion. Tambien fue elijido komo el lider del grupo «Theodor Herzl».
En akel tiempo, salieron a luz al menos sesh jurnales en franses, todos en manos de judios.
En 1908 Recanati fue uno de los fondadores de la «Maccabi».
La «Maccabi» fue fondada kon el moto de Max Nordau «judaismo Muskular».
Avrahan Recanati vido en este moto, no solamente la jimnastik fisika ma la kreasion de una figura de judio fuerte i gerreador, atado a la naturaleza i a la tierra, kon atadijo klaro a la barragania del puevlo en su pasado historiko.
Komo naturalmente, Avraham eskrivia sus artikolos en el boletin «El Maccabeo» en favor del ebreo, i de las ideas sionistas.
De un grupo sportive, se adelanto la Maccabi, i parvino ser un movimiento grande de djoventud, kon edukasion nasionala judia.
En el anyo 1917, estasiono en Makedonia una armada grande, kompuesta de askieres de los paizes de Fransia, Britanika, Rusia, Estados Unidos, Italia i Serbia.
Yitzhak Molho, investrigador i eskrivano, konto a Avraham Recanati su amigo, por su konosimento kon Rober Vibert, ke fue el editor de un periodiko franses, ma tambien era el responsable a toda la komania para la armada.
Rober Vibert avlo kon Molho al menester de dar a saver a sirkolos mas grandes, inklue los ofiseres fransezes, sovre las aspirasiones nasionalas de los judios.
Ansi, se kreo el semanal en franses «Pro Israel», kon los editores Molho i Recanati. El semanal fue despartido gratis a los askeres de las varyas armadas, a movimientos sionistas i a kumunidades judias en todo el mundo. El jurnal turo algunos 10 anyos kon prestije i gran influensia.
Aparte de eskrivir en los jurnales, eyos dos, lograron resivir una deklarasion grega ofisial de boka de Nikola Politis, el ministro de exterior, afirmando su apoyo a la kreasion de un Estado Judio en Erets Yisrael. Esto okurio en Julio 1917, unos kuantos mezes antes de la Deklarasion de Balfour.
En 1919 se kazo Avraham Recanati kon Dudun Hason, una aktivista en la asosiasion Sionista Hatehiya (re-nasimiento nasional).
En el proseso de la vida, tuvieron Avraham i Dudun dos ijos, Shemuel i David, nietos i bis-nietos.
En el mezmo anyo, en 1919, se fondo en Salonik el movimiento «haMizrahi». Avraham Recanati, en akel tiempo, por kavzo de unas diferensias de ideolojia, desho sus aktividades en la Maccabi, i se dediko a la fondasion de la organizasion haMizrahi, kon el buto de dar mas edukasion judia, i konvenser al puevlo de azer Aliya a Erets Yisrael, yamada estonses Palestina.
El fuego grande de 1917 en la sivdad, kavzo una dispersion de los judios en varyos kuartieres, i tambien se aflosharon los sentimientos relijiozos.
Indemas, el rezultado de la gerra entre Gresia i Turkiya (1919 asta 1922) kavzo, segun el Akuerdo de Lausana, un interkambio de populasion entre los dos paizes. Salonik se incho de milaryas de refujiados gregos de Turkia, la parnasa fue mas defisil para los djudios, i muchas famiyas djudias imigraron a Fransya.
No se kere ni dicho ke Recanati publikava sus artikolos en el boletin de HaMizrahi yamado «el Djidio», i kontinuo enkorajar al puevlo en favor de una Aliya masiva.
la propaganda sionista en jeneral, i tambien los atakes de los antesimitas gregos, izieron sus efeto, i mas de 20.000 jidios de Salonik pasaron a bivir en Erets Yisrael entre los anyos 1930-1938.
En su posto komo el Vise-mayor de Salonik, Recanati luchava kontra las leyes gregas ke diskriminavan a los judios.
En akel tiempo tuvo Recanati kontaktos kon Zeev Jabotinsky, i en konsekuensia, se formo en Salonik una rama del movimiento revizonista (en 1925). Sinko anyos despues, en el kongreso revizionista, Avraham Recanati, exijo ke se forme un kuerpo militar klandestino kontra el rejim mandatorio britaniko en Erets Yisrael.
Avraham Recanati i su famiya izieron Aliya en el anyo 1933. Aki, tambien, kontinuo su aktividad publika, i tuvo el zehut de ser uno de los 120 miembros de la primera Knesset.
En el anyo 1976 fue rekonosido komo Yakir Tel-Aviv (Kerido de Tel Aviv) por sus varyas echas en favor de la komunidad jeneral.
Lo rekordamos a Avraham Recanati komo un lider modesto, ma kon una determinasion infinita a promover su ideolojia judia i sionista
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
