eSefarad Noticias del Mundo Sefaradi
Kijo dizir: los buenos vizinos ensenyan i enrikesen moralmente las personas.
Ya avian empesando las rumores ke la Sigunda Gerra Mondial estava para terminar, ma mi kerida madre no se estava gustando tan muncho. Yo, kon mi chika edad le estava dando razon a eya.
Toda la famiya de mi padre estavan en la Bulgaria i kaje nada no sintiyamos de eyos achakes ke avia una sensura muy grande de parte de los Nazistos. Las letras ke mos mandavan viniyan komo dantelas, achakes ke kortavan munchos biervos.
El ermano grande de mi mama estava kon su famiya en la Palestina i ayi no se vian aserkar los dias buenos. El ermano chiko de mi mama avia pedrido su vida en un aksidente dramatiko i aviya deshado una manseva bivda kon una kreatura muy chika.
Mi gran mama maternal avia pedrido la vida achakes de estos akontesimientos. Mi mama se konyorava en dizyendo «kedimos solos i sekos.»
La vizina ke la sintia le dizia «en muestro djudezmo ay un proverbio ke dize: «Mas vale un buen vizino ke un ermano i primo», i kontinuava, «yo no tengo kreaturas, si keres puedo ser komo tu mama.»
En la pansion chika ande moravamos eramos komo una famiya grande. Avia personas ke mos davan egzemplos muy buenos i valutozos.
En el numero uno morava una famiya ke avia vinido de Ankara. Eran marido, mujer kon dos kreaturas, un poko mas grandes de mi. Los «Ankaralis», ansina los yamava yo porke avlavan solo Turko i a la kayades. De eyos me ambezi a avlar un poko mas avagar.
Makare ke los uviera konosido mas antes porke un diya suviendo al tramvay deshi la mano de mi mama i empesimos a avlar kon boz fuerte en djuedo-espanyol i los viajadores mos gritaron en Turko, «Pis Yahudi, Türkçe konuş» («djudyo suzyo, avla en turko.»)
En el numero tres morava la vizina ke le dava konsejos i koraje a mi madre.
En los numeros 5 i 6 bivian las famiyas Hakko i Alhadef. Avian vinido a la pension despues del «Varlik Vergisi» (Dasyo de Rikeza). Madam Hakko era una mujer muy serioza i tenia dos ijos grandes i todo el dia gizava para sus ijos i ija kazada ke tenia una kreatura djusto a mi edad. Toda la famiya se iva a lavorar en un magazen chiko ke tenian en el porto de Eminönü.
Todos los dias antes de ampesar al echo akompanyava a sus ijos i le dizia a su ijo Vitali «no kedes tadre», i si era dia de Viernes le dizia, «No kedes tadre, vini antes ke se aga Shabat.»
I Vitali le respondia, «Mama no peryas kudyado, no vo vinir tadre. Vo vinir kon un buketo de flores i un kuti de bonbones.» Estas palavras me ambezaron ke noche de Shabat kale vinir a kaza antes de asendar las kandelas i kon flores. Todos los vizinos de la pansion dizian ke esta famiya se va azer rika muy presto.
Grasias al Dio, la Gerra avia tomado fin i el vapor de Gerra «Missouri» estava para vijitar a Estamnbol. La munisipalidad de Estambol ampeso a boyadear las kalejas por ande ivan a pasar los marineros Amerikanos. Sintimos ke el sinyor Vitali Hakko tuvo la idea de aprontar una rida en kolores para fiestar la vijita del vapor Amerikano, ma le mankava paras.
El no se averguenso, tomo una entrevista kon el governador (Vali) de Estambol i le ekspliko su proyekto, el Vali aksepto de darle la moneda ke tenia de menester. I esto fue. Al puevlo de Estamnbol le plazyo muncho esta rida. Sienes de miles del puevlo las merkaron i munchos las resivieron debaldes. Todos konosieron la firma Vakko i empesaron a merkar los fishus de Hakko i mas tadre todo modo de vistimientas. Malgrado la muerte de Vitali la firma lavora fin a oy.
El sovrino de Vitali, fue un buen amigo miyo, vino a la fiesta del Bar Mitsva miya. Kontinuimos a ser amigos en el lise fransez.
Madam Levi la vizina ke morava en el kuatren etaj era una bivda sin kreaturas i famiya, eya me miro komo una gramama i me ambezo munchas kozas, fin a oy no me olvidi de eya i sus konsejas i kantes en djudezmo.
Yo kero eskapar mi eskrita kon el proverbio, «Ken tiene un buen vizino ambeza un buen doktrino.»
Autor
Leon Sasson
