eSefarad Noticias del Mundo Sefaradi
El kal de Zulfaris se topa en Galata – Estambol.
Zulfu-aris kere dizir en Perso kaveyos de novia, en akurtando el nombre se izo Zulfaris, ansina fue ke el kal tomo el nombre de la kaleja.
Este kal era serka de muestra kaza en Yuksek Kaldirim. Komo era enriva del kamino para irse a su echo, mi padre siempre se iva a este kal, ke no era ni muy grande, ni chiko. Ande se fiestavan todas las okazyones – bodas, barmitsvas, beritmilas, i todas las fiestas. Avia eskaleras de las dos partes de la entrada, ande todas las novyas i novyos se fotografyavan en grupo kon todos los envitados.
Tambien la boda de mis paryentes tomo lugar en este kal, siguro kon la foto en preto i blanko, ke asta oy esta enkolgada en la pared.
Arientro del kal aviya tapetes embasho, lampas de azete enkolgadas kon mechas , lavoradas kon desenes de rozas echas de plata, ande echavamos azete antes de Yom Kipur i tambien en otras okazyones. El shamash del kal vistido komo un jeneral en uniforma kon una vita dorada i chapeo. Aparejava mechas kon espinas de pino embrujadas kon algodon, para ke las mechas esten derechas i ke kemen arientro de la azete.
Al lado del kal avia una botika ke apartinia a los dos primos de mi padre. La botika i el kal partajavan la mizma pared. Para akurtar el kamino al kal i no azer el torno entero fina la fin de la kaleja tenian una chika puertizika entre la botika i el kal ke dengunos savian su egziztensya.
En este kal mos arekojiamos en kada fiesta. En Kipur oyiamos el shofar, en Sukot komo no teniamos suka en muestras kazas mos ivamos al kal para gozar un poko de la fiesta, en esta suka avia tapetes enkolgados por paredes, uvas enkolgadas de el techo aerado, las mujeres traiyan tavlas yenas de borrekas delisyozas.
Kuando ya era tiempo para fiestar Simhat Tora, el tiempo ke todas las kreaturas asperavamos.
Teniya sinko o sesh anyos, mi padre mos yevo a mi madre, mi ermano i a mi al kal para fiestar.
Mos merko feneres koloreados de papel kon la kandela arientro. Kon grande alegria kaminavamos en baylando detras de los ombres baylando kon los sefer toras. Mi padre asendyo la kandela i mos dyo los feneres en la mano, este fener tenia un mango de ilo metaliko ke se kaintava muy presto…
Emprimero todo estava muy ermozo kantes i bayles. En supito vide a los primos de mi padre, dos ombres grandes entrando por una puertizika chika, – mizmo para mi puediya ser difisil de pasar por esta puerta- me paresyo ke esto en la konseja de Alisa en pais de maraviyas. Me enkanti. Djusto en este momento pedri mi atansyon, tambien empeso a kaintarse el mango del fener i kemarme los dedidikos, echi el fener embasho enriva del tapet kon gritos i yoros, el fener se enflamo pishin. Los ombres kon los sefer en las manos gritando! Se esta kemando el kal ya mos vamos a tutushear, amata el huego chapteando kon los piezes enriva de las flamas, se kitaron las djaketas i las echaron embasho para abafar el huego.
Mi madre ke estava viendo esto de la azara estuvo echando gritos, Pepo salva las kreaturas! El shamash kon un tasiziko de agua ke trusho para amatar el huego kedo en las manos, sin saver kualo azer. Kuando ya parvinyeron a amatar el huego avia un burako preto en el tapet, los feneres, las kandelas dezechas, meskladas kon sinizas pretas, el lugar paresiya komo un kazal despues de pogrom.
Sinti una mano grande tenyendome del piskueso, era la mano de mi padre. Mos travo a mi i a mi ermano de aya mos tomo en los brasos, desho todo i mos yevo de aya.
En kamino djusto enfrente de muestra kaza en Yuksek kaldirim avia el kal de los Lehlis. Este kal era muy ermozo. El Aron Kodesh i la Teva eran echas de tavla en kolor kuyi, lavorado en stilo evropeo i muzika de organ karesando las orejas.
En pasando delantre del kal, mi padre ke avia deshado la fiesta en mitad achakes de mi, kijo kontunear a fiestar i mos entro a este kal.
Entrimos i vimos todos alegres kantando i baylando, la fiesta ya estava kaji para eskapar. Estuvimos aya kayadikos fina la fin.
A la salida vimos dos dammas elegantes kon chapeos dekorados…
kon plumas i kalsados kon talones altos a la moda de akel tiempo ke estavan ofriendo a las kreaturas unas kyulas de selofan atados kon un ermozo fiongo yeno de bonbones, masapan, i pandespanya. Pishin mi ermano i yo mos metimos a la kola de kreaturas, asperimos ke venga muestro torno i mos dieron una kyula a kada uno.
Esto fue un presyo maraviozo para trokar la savor de la boka.
Siguro ke no permetyeron mas a trayer feneres al kal de Zulfaris, ma no faltavamos kada anyo de irmos al kal de los Lehlis despues ke estuvimos en Zulfaris para gostar los bonbones.
En kada mal ay un provecho.
Autor
Shelly Swed
