eSefarad Noticias del Mundo Sefaradi
En los días vinientes vamos a ver ke empezan a vinir reklames i invitasiones de institusiones en todo el mundo para selebrar el «Día Internasional del Ladino«, en djeneral kon data de desembre. Empero oganyo la data ofisiala del Dia del Ladino es el 17 de Marso, día ke la Kneset (el Parlamento Israeliano) kreo por Ley la Autoridad Nasionala del Ladino (ANL) -i también la de Idish- la sola institusion ofisiala en el mundo dedicada a la lingua sefaradí.
Estonses ¿de ande viene la idea de organizar en desembre aktos por esto?
UN POKO DE ISTORIA
Zelda Ovadia, miembro de LadinoKomunita (LK) izo la propoesta en este grupo por la primera vez el 9 de enero de 2013 en el mesaje #44839:
“Vos esto eskriviendo este mesaje para kompartir kon vozotros i todos los ke tienen a koro i se interesan del djudeo-espanyol, su kultura i istoria, i de su riko patrimonio, una propozision, ke desde largo tiempo la tengo guadrada en mi.
Oy ke tenemos kaji en todas las partes del mundo universidades, institusiones, sentros i sirkolos ke son muy aktivos i se estan distingiendo en el kampo del djudeo-espanyol i su kultura, organizando kongresos, dias de estudio, konsertos de kantes en ladino i mas, vos demando si estarash de akordo kon mi propozision de fiksar una data para
UN DIA DE LADINO INTERNASIONAL […]”
Rachel Amado Bortnick, kriadora de LadinoKomunita, resume en el mesaje #47944 del 24 de novembre de 2013:
…i tomo munchas repuestas de apoyo. Ma no estavamos siguros si esto seria una reunion en un lugar, o komo se iva azer. Al dia sigyente Moshe Shaul (Z’L) mo lo ekspliko (1):
«[…] de tener un dia dedikado a aktividades del kampo del ladino i su kultura, simultaneamente, el mizmo dia en los diversos lugares en el mundo onde ay kolektividades de ladino-avantes. […]»
Demuevo, la idea fue resivida kon alegria. Ma paso unos kuantos mezes asta ke el sujeto se mensiono demuevo. En julio Moshe Shaul mos eskrivio ke la Autoridad de Ladino tambien aksepto el projekto, i ke se kreyo una komite (él mizmo, Zelda, i Alisia Ginio) para azer las preparasiones del program en Israel, fiksado komo el kavo dia de Hanuka (en akel anyo fue el 5 Desembre)[…]
[…]Entre mientres, el 22 oktobre, Zelda me demando de mandarles un video de saludos mios para el program en Israel […]
I fue komo una eksplozion, una senteya ke aferro fuego! Mas i mas lugares empesaron adjuntarsen a esta selebrasion […]
Ke ermozo sentimiento ke es tener esta unidad para muestra lingua i kultura. Onoramos a Zelda Ovadia por su maravioza idea.
El 31 de julio de 2015 la misma Zelda nos comunicaba con un meil partikolar ke mos mando a Rachel Amado Bortnick, Jenny Laneurie, Karen Sharhon i a mi, Liliana Benveniste:
Vos kero informar, ke segun una desizion ke fue tomada por el muevo komite de la Autoridad Nasionala del Ladino, ke su Prezidente es agora la Prof. Tamar Alexander, el DidL (Dia Internasional del Ladino) tendra lugar en Israel, el dia ke fue akseptada en la Kneset la ley para la kreasion de las Autoridades del Yidish i Ladino. (17 de marzo de 1997)
[…]Tengo miedo ke la savor i la alegria ke tuvimos en los anyos pasados de estar «endjuntos» mizmo de leshos, se va pedrer. Ke se aze kuando las kozas trokan.. ma lo importante es de markar este dia kon korason alegre […]
ANSÍ KOMO ESTAVA DICHO
Esta dechizion de la ANL provoko djustamente lo ke Zelda temia, las institusiones, algunas de eyas Universidades ke ya venían organizando por 2 anyos, desde 2013, el Dia Internasional del Ladino en desembre, dechizaron no trokar por konveniensia programatika de la universisad, otras institusiones por epoka de vakanzas en su paiz i otros por ignoransia o por kapricho, estonses tenemos selebrasiones (vinidas en bonora sean de todos modos) en diferentes datas, mizmo en otros periodos del anyo.
Entiendo ke tiene un importante papel el ingrediente esmoviente i evokativo de la propoesta orijinala de Zelda, ma me parese bueno el trokamiento echo en 2015 por las muevas otoridades de la ANL porke para los djudíos este dia, el 8en día de Hanuka, ya tiene por sí su valor festivo por ser la noche de alkavo de esta fiesta i ya tiene su selebrasion partikolar. También penso ke akeya data, al depender de una festividad del kalendario djudío, kada anyo se mueve de día asigun el kalendario gregoriano, i esto me penso ke aze mas difichil de kriar en el kolektivo sefaradí i filo-sefaradi un atadijo entre la data i la selebrasion de un día dedikado al ladino.
Komo dize mas enrriva, en el anyo 2013, el de la primera proposta, la 8en. noche de Hánuka tokó 5 de desembre -solo por ese anyo- i munchos organizadores no konosientes de el kalendario de festividades djudías, empezaron a afirmar ke el Día Internasional del Ladino era en esa data fiksa, mizmo kuando en los anyos sigientes no se korrespondio kon esta fiesta i indemas ya estava trokada la data por la ANL.
¡Todo un emburujo!
A la fin, la data ofisial i mas sinyfikante del DÍA INTERNASIONAL DEL LADINO es el 17 de Marzo ya establesida por la Autoridad Nasionala del Ladino en 2015, seyga konveniente o no a la programasión de las institusiones ma, komo munchas kozas referentes a la lingua, parese ke esto también es motivo de konfusión.
Liliana Tchukran-Benveniste
26/09/2023
———————————-
(1) En ese momento Moshe Shaul era el Direktor/Prezidente de la ANL.
