eSefarad Noticias del Mundo Sefaradi
Dospues de un mez de vakansa, veramente ya me eskarinyi de eskrivir. Sovretodo kuando mis lektores me demandaron:
“Para ambezar no ay edad” es una dicha muy djusta. Si sos kuryoza i te plaze ambezar ay munchos kanales de bushkar. Yo so amatora de radyo, en vezes me dizen en avyendo televizyon kualo topas en la radyo. Si, la televizyon es una grande kompaniya ama no esto pudyendo rezistir a las seriyas turkas, largas, aburidas de negreguras, todos los sujetos mizmos.
Las demanyanas lo syento a mi ijiko ke es dc. en un radyo. Ya es avliston ma yene kedo kuryoza dande topa tantos sujetos. Ayer, en prezentando las kantikas, kon una ironiya, se kecho de los ke dan konjejos sin ser nesesaryos.
En la Büyükada los diyas de djugeves ay pazariko. Yo me vo demprano sin ke puje la kalor. En empleyando fasulyas, una konosida sin dizir bonjour a las ocho de demanyana
– No yooo…
-Yo no va azer dulse de vijna
– Atyo asukar tyenes… toma un limon, esprimelo, kada demanyana kon agua tivya …
-Nooo…. Ayde eskapa el Pazar vate a la eskala, beve un chay, kon un ermozo börek ay murir..
Lo mas terivle es, ken da konsejos de kuras i nombres de doktores. Ten pekados i dizele ke tyenes una dolor, ya bolates
– Yo empleyo syertas kuras si tomo kuatro voltarenes al diya, me vo al otro mundo, tyenes razon no me keda nada
– Ayde no ay dingun mal tu oyeme a mi me vas a bendizir
Ay ken da konsejos de lugares de vakansas i nombres de oteles, te vas ni el otel vale, las komidas dezgrasya si las oyes te sale las vakansa spor la nariz.
Si oyen ke Tyenes djente, barminan
-Aze una tarama, unas dolmaikas, un piyaz, arroz i gayna i por dulsurya…
– No los va yevar afuera a komer
– Afuera??? Esta muy karo, vate a tal Restoran aya es mas barato un pishkado alavado
– Mozos no keremos pishkado
– No keres pishkado, en Yeşilköy ay un kebapçı aya yevalos, aze un lahmadjun maraviyozo…
Komo estos ay miles de “konsejos de perros vyejos”.
Por siguro ke ay menester de konsultar i ay personas savidas ke dan konsejos valutozos.
A todo lo ke konti ariva, puedo suportar solo si me dizen:
“Mira hanum yo si so de ti”…
Ke no me digan es mijor. No se lo ke les puedo responder.
Al vermos.
Forti BAROKAS
Fuente: turkisrael.org.il
