En djudeo-espanyol

El anyo 2009 fue el sigundo kurso de ladino ke la profesora Esther Cohen de Cohen i yo diktamos edjuntas en el CIDiCSef.

Por eskapar el kurso, el diya 30 de noviembre de 2009, enkomendamos a muestos elevos ke trujeran algun lavoro propio o eskojido de algun livro o eskrito ke mozotros les dimos, para amostrar lo ke se ambezaron durante el kurso.

Una de muestras elevas, Sara Barzilay, mos konto a todos kon muncha grasia esta konseja de Djoha ke metí akí en basho.

KONSEJIKA DE DJOJA

 Estava Djojá por salir a vender a otras sivdades sirka de la suya, endjunto kon su dishiplo. Tomó dos bogos kon merkansias, los metió enriva de un asno, se suvió él mismo al asno, i ansina salieron al kamino.

Ensupitó, se toparon kon unas djentes ke los miravan i avlaban por lo basho i riyan, a ma eyos ya sintieron kualo estavan diziendo: ¿Komo pudía ser ke un  ombre rezio, sano i benadam, esté sovre el asno, i el povereto del dishiplo vayga a pie?.

Djohá i el dishiplo se miraron i se entendieron, abashó Djojá del asno, se suvió el dishiplo, i ansina ayegaron al charshí.

En el charshí, se toparon kon otras djentes, que otruna ves se burlaron de eyos i le gritavan a dishiplo: ¿Ke komporto es este? El djoven suvido al asno, i el sinyor aedado, ke se kansa más presto, va kaminando?

Djohá i el dishiplo se miraron i se entendieron, Djojá suvió al dishiplo endjunto kon él enriva del asno, i ansina salieron al kamino.

Otras djentes ke se toparon en el kamino, empesaron a gritarles: ¿No tienen piedad del asno? ¡lo van a revientar kon tanto pezgo!

Djohá i el dishiplo se miraron i se entendieron, abasharon los dos del asno i avoltaron a sus kazas kaminado Djojá, el dishiplo i el asno.

En yegando a su sivdad, los vizinos los vieron vinir i se burlaron:¡Na! ¡Miren todos! ¡Aki vienen un asno y dos gameos!.

¡Eyos esten bien i mozotros tambien!

Avagar, avagariko vos voy a ir amostrando otras kozas ke muestros elevos izieron este diya.
Liliana Benveniste