eSefarad Noticias del Mundo Sefaradi
———————————————————————–
En esta sigunda eskrita vos dare detalyos sovre las 11 sesiones ke fueron echas en las salas de la Akademiya de Sensia i Arte de Skopje (Uskup) i en las salas del Sentro del Memorial del Olokosto Djudio de Uskup.
-En la primera sesión dirijada por el prof. Ohayon de Bar Ilan (BIU) tomo la palavra el presidente del kolokio Prof. Shmuel Refael ke mos adreso en un largo aparado sovre la rejion balkanika, sus djudios i la relasyon entre eyos i la zona onde bivieron. El prof. Boban Petrovski de la universitad Ss Cyril avlo de los djudios de Makedonia en los tekstos de los livros kontemporenos de istoria.
-En la sigunda sesión dirijada por el prof.Yaron Harel de BIU, el prof.Jose Alberto D.S. Tavim de la Universitad de Evora, Portugal, mos prezento en su eskrita los Balkanes komo lugar de transisyon para los konversos portugezos ke se fueron verso el imperio Otomano. El prof. Luan Starova de la Akademia de Makedonia analizo en un lavoro de ‘Edgar Moren’ la vida de los sefaradim Makedonianos. La doktoresa (drsa) Antoanela Petkovska i el doktor (dr) Popovski Kostantin Minoski de la Universitad SS Cyril mos presentaron statistikas demonstrando ke el antisemitismo en general en la povlasion makedoniana es a bastante basha. Bien entendido difera entre la kristiana i la musulmana, la kristiana no depasando la mita de la musulmana.
Konkluaron ke kaji 19 % de la povlasion se deklaran no kerer bivir al lado de los djudios… En fin de sesión la drsa. Anetta Buras-Marciniak de la Universitad de Lodz, Polonia prezento su lavoro al sujeto de la situasyon sosio-kulturala de los djudios de Bosnia.
-En la tresera sesión dirijada por le prof. Ribi, Moshe Amar de BIU, el prof.Shaul Regev de BIU izo siertas remarkas al sujeto de los diskorsos (dirouch) de Ribi Yosef Zarfati i el dr. Hadar Lipshits de la Akademia de Ashkelon(AAC) avlo de las reglas de la mayoriya: Responsa echa por Ribi Binyamin Zeev Arta. En fin de sesión el dr. Eliav Taub de AAC mos avlo de la vida de Ribi Meir Leibush ben Jehiel Michel (Malbim) ke fue exspulzado de Romania i ke se refujio finalmente en Estambol. Lider ke miro de sovreguardar la ortodoksia relijioza en los Balkanes i ke lucho kontra los reformistos djudios.
-En la kuatrena sesión dirijada por el dr. Selim Yehoshua Salti de BIU, el prof.Yaron Harel konto sovre las investigasyones ke izo en el Hahambasilik de Estambol sovre los dokumentos en ladino ke se topan en sus archives i mos dio a entender komo fue echa por la primera ves en la historia de este pais la mobilizasyon de los djudios en la armada Otoman durante los anios 1910/12. La drsa. Gila Hadar de la Universita de Haifa mos konto las relasyones ekonomikas i sosialas entre Uskup i Saloniko espesialamente lo ke fue eskrito en la prensa de esta sivdad sovre los djudios Makedonianos. El dr. Michael Studemund-Halevy del Institut fur die Geschichte der Deutschen Juden en su deklarasion mos avlo de la lingua judeo espanyola, de su futuro i de la manera ke los lingustos la ven aktualamente. En fin de sesión la drsa. Friederike Ruth Winkler de Wiener Gesellschaft mos konto la vida de los merkadores djudios balkanikos establisidos en Vienna durante el 19e sieglo.
-En la sinkenia sesión dirijada por el prof.Shaul Regev de BIU,el prof. Asher Ovadiah de la Universitad de Tel Aviv, mos avlo de la epokas de Roma i de Bizans, onde en la Trakya i Makedonia bivian djudios. Las epítafes ke se toparon en tombas, sinagogas i mas.. Prof.Ribi Moshe Amar de AAC mos ekspliko el kontroveso ke tuvo lugar entre los Savios de la epoka del exilio i Rav Yaakov ben Haviv . La prof. Leah Bornstein-Makovetsky de la Universitad Ariel mos konto komo las misiones protestanas de Los Estados Unidos, de Ingletiera i de la Skotland fueron aktivas en los Balkanes en el 19e sieglo serka de las komunidades djudias. Prof. Raphael Israeli de la Universitad Ebraika de Yerushalayim mos dio a entender el suerte de las komunidades djudias de los Balkanes debasho la dominasyon Otomana. A la fin mos avlo el Dr.Yitzhak Mualem de AAC ke mos disho komo el Estado de Israel resin establisido organizo sus relasyones diplomatikas kon la Grecia. Uno de los butos de estas relasyones era de salvar los djudios komunistos emprizonados durante la guera sivil en Grecia.
-En la sejena sesión dirijada por la prof. Tamar Alexander de la Universitad Ben Gurion , la primera a tomar la palavra fue la prof.Alisa Meyuhas Ginio de la Universitad de Tel-Aviv. Eya mos presento su lavoro sovre el Meam Loez de Rabbi Yaakov Khuli, ke fue eskrito en ladino i publikado en Estambol en 1730. Se konsantro sovre los Kuatro Reinados onde el puevlo djudio sufrió. Dra. Nivi Gomel de la BIU mos dyo a konoser los bultenes imprimados en Ladino publikados al inisio del sieglo 20 i embiyados en Grecia, Turkia i Palestina. El buto era de analizar la lingua judeo espagnola de su kontinido i de azer en mismo tiempo la propaganda sionista. Eyos a lo mas fueron eskritos kon letras Rashi. A la fin la drsa.Aleksandra Twardowska de la Universitad Nicolaus Copernicus mos informo de un dokumento » Las frontieras de la Makedonia» eskrito en Ladino por Rafael Kamhi el kual mos konta sovre las diskusiones politikas ke tuvo lugar entre Theodor Hertzl i Goree Petrov –nasyonalisto makedoniano.
-En la sietena sesión dirijada por el Prof. Ephraim Hazan de BIU, se trato del tema del Olokosto. El primer a avlar fue el dr. Paul Isaac Hagouel miembro de la Komunidad de Saloniko, el kual obtuvo su PhD. de la Universitad de Kalifornia, Berkeley. Hagouel demonstro la krualidad de los Bulgaros ke okuparon la Grecia del norte. Eyos son responsables de la deportasyon de los djudios de Kavala, Serres, Xanthi i mas, kuando okuparon estos teritorios. La memoria, los faktos no deven de ser olvidados de dinguna manera. El dr. Gideon Graf de Shem Olam mos avlo de las sufriensas de los djudios Gregos en Auschwitz, de sus unikos aspektos i disho ke mismo djudios de la evropa santral no miraron de ayudarlos por ke eyos no avlavan el Yidish. El dr.Stephen Suleyman Schwarts del Sentro del Pluralismo Islamiko mos prezento su artikolo sovre la komplisitad del governo Bulgaro en la destruksyon de los djudios Makedonianos. El dr. Ofer Muchtar de AAC en su prezantasyon mos konto komo los Albanezos salvaron sus 200 djudios durante los tiempos aliskuros de la Evropa durante la sigunda guerra mondiala. Enfin de sesión la drsa. Rachel Shelly Levy-Drummer de BIU mos prezento al biz inyeto, Leka Rezniqi, de un «Justo entre las nasyones» i eyos mos kontaron komo fue salvado de los nazistas el nono de Shelly el Dr. Abravanel de Makedonia durante la sigunda guerra mondiala.
-En la ochena sesión dirijada por la prof.Leah Bornstein-Makovetsky de la Universitad Ariel, el primer a avlar fue el prof.Ephraim Hazan sovre la poesía ebraika dospues del exilio iberiko en los Balkanes i en la Afrika del norte.La drsa. Katja Smid de la Universitad de Salamanka, Espanya prezento un lavoro sovre el»Sefer Haberit» traduisido en Ladino i muy popular entre los djudios evropeos del 18e sieglo. La drsa. Revital Refael-Vivante avlo de la literatura sefaradí en ebreo dospues del exilio iberiko en los Balkanes.
-En la sesión mueve dedikada a la memoria de JAMILA ANDJELA KOLONOMOS i ke fue dirijada por la prof. Alisa Meyuhas Ginio de la Universitad de Tel-Aviv se trato de la literatura folklorika en jeneral. Un omaje especial fue echo a la sinyora Kolonomos por su lavoro muy importante en el kampo del folklor djudio balkaniko i del Ladino. Diferentes personas tomaron la palavra a este sujeto. La drsa. Krinka Vidakovic-Petrov del Instituto de Literatura i Arte de Belgrado, mos prezento un lavoro sovre el folklor sefaradi de los Balkanes, lugar onde la kultura sefaradita se renkontra kon la kultura slava. La prof.Tamar Alexander de la Universitad Ben Gurion mos dyo a konoser un lavoro interesante al sujeto del rey Alexander de Makedonia en la literatura del midrash i del talmud. La drsa. Nina Pinto Abecasis de BIU i de La Universita Open, trato del sujeto del folklor umoristiko de los sefaradís enfrente la muerte. La sinyora Mira Cohen Starkman eleva doktorant de BIU mos prezento su estudio sovre el Dr.Meir Yoel, ke eskrivyo sus memorias en Ladino ke fueron publikados en el anio 1938.
-En la diziena sesión dirijada por el prof.Joseph Schwarzwald de BIU, en primer mos avlo el prof. Muhamet Mala de la Universitad Pristina del Kosovo sovre la morada enjuntos de los Albanezos i de los Sefaradis en Kosovo. La drsa. Carmela Saranga de AAC mos konto sovre el diario de Haim Nahmias eskrito en Ladino. La drsa. Pilar Romeu Ferre de Barcelona, presento un lavoro sovre los djudios de Manastir, los kualos konservaron sus raises iberikos. Eya se refera a las ovras echas por Avram Sadikario, Jamila Kolonomos i mas otros. A la fin mos avlo la drsa. Lily Zamir del Kolejio Akademiko de Eduksayon David Yellin, sovre Danilo Kis ke konto el Olokosto de los djudios Yugoslavos.
-En la onzena i dalkavo sesión dirijada por el sinyor Goran Sadikarijo CEO de la Fundasyon del Olokosto de los Djudios de Makedonia, en primer la drsa. Hilary Pomeroy de la University College, de Londres prezento su lavoro. Eya egzamino komo la literatura medievala, las romansas de los djudios espagnoles kontinuaron en los Balkanes a ser tanto amblimatikos. Cvetan Grozdanov, sekretario del Departamento de Siensies Sosiales de la Akademia de Siensias i Artes de Makedonia, el avlo sovre los retratos de los profetas biblikos en una de las antikas iklisias de Ohid, Makedonia. La drsa Rivka Havassy de BIU en dalkavo presento su estudio sovre el modo de kantes populares de Saloniko entre las dos gueras mondialas.
Sin la asistencia del Dr.Shimon Ohayon i del Prof.Yaron Harel la sinyora Ora Kobelkokowsky del Sentro Dahan de BIU, ke peno muncho para la realizasyon de este kolokio no se pudia akumplir. Un grande rengrasiamento a eyos.
Las sesiones fueron filmadas, se espera ke un tiempo serkano el filmo ke se aparejara será publikado en Youtube.
Selim Salti
