eSefarad Noticias del Mundo Sefaradi
La kayida en supito del rejim de Assad no solo representa un grande tokamiento para la Siria ma un rach jeopolitikal en el Medyo Oriente. La kayida de la stratejiya iranyana en esta rejyon se asemeja a la kayida del muro de Berlin en 1989 el kual fue la kavza a ke 2 anyos mas tadre el rejim komunisto ruso dispareska. En akeya epoka el Ayetollah Khomeyni avia dado a entender a su administrasyon de no kayer un diya en la mizma situasyon de disparisyon del rejim Ruso en mirando de impozar una politika etranjera de dominasyon i muy dura al interno del payis. Konsejo ke malorozamente no fue tomado en konsiderasyon del todo.
Despues de la fuyida de Assad el rejim del Iran se topa en un estado malo, espantozo de su egzistensya, visto ke el peryo 50 miliardas de dólares investidos en los proksis Sirianos, Libanezos i en el Hamas para mentenir el akso shiito kontra Israel, el kual esta para despareser. Ademas la muerte de miles de kombatantes i personeles de los proksis i de los Guardianos de la revolusyon iraniana fue ‘azete echada al fuego’ kontra los ayetollahes. La birra del ayetollah Ali Khamenei fue tanto grande ke kuando le demandaron si el achetava a aresivir Assad en el payis, el disho un grande NO. Para Khomenei Assad es un traito ke vendyo la kavza del kruasan shiito. Se ve ke la kayida del rejim Baasisto en la Siria es de fakto una desfetcha de la politika imperyalista del Iran ke su buto era de dominar el Levante.
De otra parte kon la ida de Assad a la Rusia Khamenei se topa en frente de una mueva dilema en no kedandole mas una grande influensa en el Libano, en Gaza i en Yehuda i Shomron. El grande ayetollah Ali Sistani del Irak tomando avantaje de la situasyon se propoza a ser el muevo líder del shiizmo en el Medyo Oriente. No abasta esto al interno del payis el se konfronta mizmo al seno de la baza de su fuersa, ke ampesa a amostrar sus deskontentes. El perye muncho de su popularidad en la kaye iranyana i su mas grande espanto es de toparse enfrente de una inimista popular.
La priorita del rejim Iraniano aktuelmente es de establisir un dialog kon el ombre fuerte de Damas Abu Mohammed Al-Golani kon el kual miran de formular un muevo akordo militante bazado sovre el islamizmo i el antisemitizmo. Por las oras no se pensa ke se puede alkansar a una rekonosensia resiproka entre las dos partidas. Al-Golani ke es el suvrino del viejo ministro del etranjero siriano Farouk al-Sharaa en su primer diskorso avia deklarado ke los Iranyanos no son vistos komo amigos i la prove es ke la ambasada iraniana onde fue kreado anyos antes el Hezbollah fue serada. Ma en poko tiempo esta situasyon puede trokar, espesialamente si el Iran mira de merkar kon miliaradas de dólares a los muevos dirijentes Sirianos ke por las oras no mostran sus intisyones. En todo kavzo la Siria nesesita ser sopordada por el oksidente si se kerara dezveloparse, dunke devra manovrar kon fineza i atansyon sus relasyones kon los ayetollahes.
El muevo poeder de Damas Hayat Tahrir al-Sham (HTS) es kompozado de diferentes fraksyones de islamistos ke la Turkiya apoya. El prezidente Erdogan kon sus ideas nostaljikas de krear un muevo imperyo Ottomano, ke dirijo por 400 anyos el Levante, no ve kon un buen ojo la prezensya de los shiites en tyerra sunnita i es probable ke una kompetisyon inimiga se kreera en el futuro entre el Iran i la Turkiya. Ademas no kale olvidar la prezensya de los Kurdos sirianos ke kontrolan el 35 % del territoryo siriano los kualos por las oras no dechidieron a ajuntarsen kon el poeder de Damas. Los Kurdos en prensipyo todo en mirando de estar de buenas kon el rejim iranyano, no lo sufren muncho visto ke la minoridad kurda de este payis es maltretada por este poeder.
14 mezes desde de la operasyon ‘La tempesta El-Aksa’ ke Khamenei la avia deklarado komo un importante benefisyo de la rezistensya enverso Israel no se realizo, visto ke el ‘Akso de la rezistensya iranyano’ aktualamente esta dezazido. Si ajustamos a esto ke los sunnitos proksis apuyados por Erdogan ke se topan en el poeder en Siria no kolavoran a mentenir los akordos viejos, el Iran obligado de retirarse de la zona medya-orientala las shanses de sovrebiviensa del rejim fondamentalisto islamisto de los ayetollahes por siguro se amenguara i mizmo disparesera.
Dr. Selim Salti
Fuente: BÜLTEN de los turkanos de Israel – turkisrael.org.il
