KANTONIKO DE TIYO LEZO por Eliezer Papo – Poezia: TRES SKELETOS

Meldar todos los artíkolos de esta seksión

 
TRES SKELETOS

Tres skeletos kayados,
Blankokaveyados,
Alderedor la meza,
Esperan al kuarten.

En la vida no supieron,
Uno sin otro bivir,
I ek – afilu muertos,
Esperan a son ami.

Las kartas estan spartidas,
Para eyos tres – i para’l kuarten.
El kual bive, sufre
Zavali, el misken,

Las kartas estan spartidas,
Para los tres – i para’l kuarten.
Todo esta pronto ya de mucho tiempo,
Solo se espera, la levaya de el.

Ma el kon la alma se esta kombatiendo
Kon ultimas fuersas la esta deteniendo,
Kon la boz perdiente le esta diziendo,
No kero morir – yo kero segir.

Ama kada djugo viene a su kavo,
Uno: presto, presto – otros: paso, paso.
A todos mos espera algun edeniko
Algun djinemiko, o un grande nada.

Muriendo, el viejo sinyor s’akorda
De la kompania.
Lamentarlos a eyos lo faze pasar
De si por ensima…
I ek – se topa nela meza…

Las kartas estan spartidas,
Para los tres – i para’l kuarten.
I viejo djugo ek empesa,
Kon la fuersa de una vez.

El viejo sinyor gano
ilugo partiyas tres,
Muriendose de riza,
de su spanto de una vez.

 

Eliezer Papo, Adar Rishon 5763

 

Eliezer Papo es nasido en  Sarajevo, Bosnia i Hercegovina i mora en Israel. Es avokado, rabino, eskritor i profesor en el Departamento de Literatura Ebrea en Ben-Gurion University of the Negev, Beer Sheva, Israel annde ensenya foklor i literatura popular, espesialmente literatura i kultura sefaradi. Tiene eskritos i artikolos en ladino, puvlikasiones i prezentasiones el kongresos i simposios.
Es  protagonista del dokumental El ultimo Sefaradi (2003) una produksion de Alea / Televisión Española (TVE) / ARTE G.E.I.E