eSefarad Noticias del Mundo Sefaradi
Meldar todos los artíkolos de esta seksión
Si te digan…
Si te digan ke me vieron aizlado,
No deskuvras ke estava a tu lado.
Si te digan ke me vieron kior-kandil,
No les kontes ke tu beyeza, fue eya mi boteya.
Si te digo ke estava a tu lado,
Tu me kreyes porke saves d’enspiritu vo avlando
Ma si digo ke tu lindeza, entosega, enboracha…
No lo tengo por siguro ke entiendes mi intento –
I por esto, presto, presto, lo espiego:
Tus beyezas, las d’adientro i las d’afuera,
Kon tus faltas – tanto altas
I kaprichos – muy bendichos
A ti t’azen entrokable – i a mi enamorado.
Eliezer Papo, Marso 2005
Eliezer Papo es nasido en Sarajevo, Bosnia i Hercegovina i mora en Israel. Es avokado, rabino, eskritor i profesor en el Departamento de Literatura Ebrea en Ben-Gurion University of the Negev, Beer Sheva, Israel annde ensenya foklor i literatura popular, espesialmente literatura i kultura sefaradi. Tiene eskritos i artikolos en ladino, puvlikasiones i prezentasiones el kongresos i simposios.
Es protagonista del dokumental El ultimo Sefaradi (2003) una produksion de Alea / Televisión Española (TVE) / ARTE G.E.I.E
