KANTONIKO DE TIYO LEZO por Eliezer Papo – Poezia: MARIFETES DE MUJERES

Meldar todos los artíkolos de esta seksión

 
MARIFETES DE MUJERES

Ke te pasa?
Komo sorda!
Ya te dishe,
No sos gorda.

Kuando digo
Fustan blanko
Ke es lindo
No aludo
Ke el grizo
Es perdido.

Kon vozotras,
No ay otras,
K’estar mudo.

Saves kualo,
Nada malo,
Puedes irte
Al deznudo.

No rievo,
Vo matarme,
Indolente
Me yamates?
Este pino,
Komo vino,
A tu tino
Delgadino?

Loko, loko,
Me kitates,
El mioyo
Me sakates
I la sangre
me chupates.

Yo so kruel?
Violente?
Ah, ke boka
Insolente.
No aprovo!

I al kavo,
Saves kualo,
‘S tu ermana,
No me toka,
Tu sos loka,
Prometites
Ke vengamos
A las siete.
Son las mueve,
I tu trokas
Los chapinos
I las chantas,
Los kaishes,
Todos feos,
Los chardakes
de chapeos,
marifetes de mujeres.

Eliezer Papo, marso 2005

Eliezer Papo es nasido en  Sarajevo, Bosnia i Hercegovina i mora en Israel. Es avokado, rabino, eskritor i profesor en el Departamento de Literatura Ebrea en Ben-Gurion University of the Negev, Beer Sheva, Israel annde ensenya foklor i literatura popular, espesialmente literatura i kultura sefaradi. Tiene eskritos i artikolos en ladino, puvlikasiones i prezentasiones el kongresos i simposios.
Es  protagonista del dokumental El ultimo Sefaradi (2003) una produksion de Alea / Televisión Española (TVE) / ARTE G.E.I.E