eSefarad Noticias del Mundo Sefaradi
Meldar todos los artíkolos de esta seksión
El retorno de Djoha
Dervish Djoha i la vaka del chuili Turko
Una vez salio Djoha al viaje. – Para non ser molestado ‘nel kamino, desidio de vistirse komo de dervish.
En el medio del kamino ya se le aserko un chuili Turko ke pensava ke este en verdad era un dervish. Este chuili tuvo una vaka muy kara i muy presioza – i el ikar de su parnasa era de la leche de esta vaka – ansina ke, kvando esta vaka s’izo hazina, este chuili desidio de azer todo lo posivle para ke la vaka se sane, i kvando lo vido a este dervish s’alegro una alegria grande sin kavo, i le rogo ke le venga kon el a su kazal para dizir alguna duva – o por lo menos ke le eskriva un amayli.
El bueno de muestro Djoha, ke non tuvo ni minor gana de irse kon el chuili a su kazal, sako un pidasiko de arti i le skrivio unas kvantas palavrikas entregandolas al chuili ke empeso a saltar de tanta alegria.
La vaka d’akel chuili torno a su estado anterior – i la kunseja se iva skapar aki – si non avia por un vizino djudio d’akel chuili. Dos-tres mezes dispues del maase s’enhazino la vaka d’este Djidio. Non saviendo kvalo azer empeso a akesharse a su vizino Turko. Este le disho: Mira, onde las vakas no ay relijiones – i si este amayli le ayudo a la vaka miya, le puede ayudar a la tuya tambien.
El Djidyo ke non tuvo kvalo de perder, i saviendo ke los amaylis de loz muzolmanos no son avoda zara achito de provar uzar este amayli.
Kvando el vizino le trusho el amayli, el Djidio, non podiendo sustenerse, avrio el amayli – i se mariviyo muy muncho kvando topo en el estas palavras shpanyolas, skritas kon las letras de Rashid:
KE ME BIVAS VAKA TURKA –
SI NO KERES TU TE MUERES.
Eliezer Papo
Eliezer Papo es nasido en Sarajevo, Bosnia i Hercegovina i mora en Israel. Es avokado, rabino, eskritor i profesor en el Departamento de Literatura Ebrea en Ben-Gurion University of the Negev, Beer Sheva, Israel annde ensenya foklor i literatura popular, espesialmente literatura i kultura sefaradi. Tiene eskritos i artikolos en ladino, puvlikasiones i prezentasiones el kongresos i simposios.
Es protagonista del dokumental El ultimo Sefaradi (2003) una produksion de Alea / Televisión Española (TVE) / ARTE G.E.I.E
