eSefarad Noticias del Mundo Sefaradi
Meldar todos los artíkolos de esta seksión
El retorno de Djoha
Djoha ke non kijo kazar – ma lo supo eksplikar
Todos ya saven ke Djoha nunka kijo kazar. Su famiya siempre le aprontavan konoseres sin ke sepa el para kvalo lo invitaron – ama de vez in vez el les dizia asta ke tengo este mioyo – no me kazo yo. Una vez kvando su tiyo se mityo de muevo para meterle en la kavesa ke tiene ke kazarse, Djoha le arespondio ansina:
Mira, te kontare una konseja – i tu, komo kazado, digame si en verdad la vida de los kazados no ez ansina.
Una agila arodiyava una shara para ver si topa algo de komer. Indunu vido por abasho una rapoza. Atero de enriva i se la achapo kon sus pandjas – ama la rapoza no si desho – sino empeso a kombatir kon la agila. Ansina kombatieron en el aire asta ke al kavo la rapoza non kayo a la tierra kon el piko i kon las pandjas de la agila en la boka.
Kunseja buena – li disho el tiyo – ama loke tiene endjunto kon el kazamiento?
E, ansina miymo ez i el kazamiento. El ombre, patocho, pensa ke ez el ke achapo – ama al kavo no keda de el mas ke los firales i la taka – i el resto se lo engluta la mujer.
Eliezer Papo
Eliezer Papo es nasido en Sarajevo, Bosnia i Hercegovina i mora en Israel. Es avokado, rabino, eskritor i profesor en el Departamento de Literatura Ebrea en Ben-Gurion University of the Negev, Beer Sheva, Israel annde ensenya foklor i literatura popular, espesialmente literatura i kultura sefaradi. Tiene eskritos i artikolos en ladino, puvlikasiones i prezentasiones el kongresos i simposios.
Es protagonista del dokumental El ultimo Sefaradi (2003) una produksion de Alea / Televisión Española (TVE) / ARTE G.E.I.E
