eSefarad Noticias del Mundo Sefaradi
Meldar todos los artíkolos de esta seksión
El retorno de Djoha
Djoha i la levaya
Una vez Djoha vido muncha djente ke se van detras de un tabut.
Loke ez esto? – se dimando de si para si. Se fue kon eyos.
Esta eskuchando, todos stan avlando de algun sinyor Levi ke era un lavorador publiko, una persona ke amava a la djente i ke simepre dava muncha sedaka, i komo ke oy moz sta deshando para siempre, i todos stan viniendo a darle ultimo rispekto.
Bash ustune, disho Djoha, me vo meter aki para ver kvando vendra este i si siempre sta dando sidaka – sovre una kvanto i kvanto ke me va a dar agora kvando sta de partir para siempre.
Bueno, la levaya sige andando, i bueno de muestro Djoha se va kon eyos, mirando todo el tiempo de ke parte va vinir sinyor Levi. Mirando, mirando – ma sinyor Levi non viene.
Djusto en el momento kvando empesaron a bashar el tabut a la tiera, grito Djoha kon una boz de edzesperansa: Onde sta este Levi – komo si lo englutio la tierra?
Eliezer Papo
Eliezer Papo es nasido en Sarajevo, Bosnia i Hercegovina i mora en Israel. Es avokado, rabino, eskritor i profesor en el Departamento de Literatura Ebrea en Ben-Gurion University of the Negev, Beer Sheva, Israel annde ensenya foklor i literatura popular, espesialmente literatura i kultura sefaradi. Tiene eskritos i artikolos en ladino, puvlikasiones i prezentasiones el kongresos i simposios.
Es protagonista del dokumental El ultimo Sefaradi (2003) una produksion de Alea / Televisión Española (TVE) / ARTE G.E.I.E
