eSefarad Noticias del Mundo Sefaradi
Meldar todos los artíkolos de esta seksión
El retorno de Djoha
Djoha i la kultura jeneral
Djoha i su amigo stan diskutiendo aktualidades.
Le dize el amigo:
- Eskuchatis ke se murio Agnon?
- Si? – dimanda Djoha kon deskreyensia.
- Si, si – ya si murio – kontesta el amigo.
- Agnon si murio – acheta Djoha, ripitiendo kon una boz dramatika.
- Si… ke triste… – kontina el amigo.
- I ayudame a rekordar – ken era este Agnon? – dimanda Djoha.
- Ken era Agnon? No saves ken era Agnon – dimanda el amigo kon indignasion – Agnon era un eskritor kunesido…
- Eskritor? – dimanda Djoha kon muncha presiasion.
- Si… eskritor – kontesta el amigo.
- I se murio?
- Si, se murio.
- I ken va ser eskritor agora? – dimanda Djoha bien apensado.
Eliezer Papo
Eliezer Papo es nasido en Sarajevo, Bosnia i Hercegovina i mora en Israel. Es avokado, rabino, eskritor i profesor en el Departamento de Literatura Ebrea en Ben-Gurion University of the Negev, Beer Sheva, Israel annde ensenya foklor i literatura popular, espesialmente literatura i kultura sefaradi. Tiene eskritos i artikolos en ladino, puvlikasiones i prezentasiones el kongresos i simposios.
Es protagonista del dokumental El ultimo Sefaradi (2003) una produksion de Alea / Televisión Española (TVE) / ARTE G.E.I.E
