eSefarad Noticias del Mundo Sefaradi
Keridos amigos i amigas
Aserkando de «Anzac Day», el Jewish News de esta semana avla de «John Henry Patterson’ ke avia entrenado en la Primera Gerra Mundial a la Brigada Judia en la gerra de los Aznos Judios. Sin ke lo sepa, Patterson avia djugado un rolo en la independensia de Israel. Mismo komo un Sionisto Kristiano Irlandezo, su dezeo fue de ser enterrado en el Estado Judio.
Saludes a todos.
LA VIDA DE JOHN HENRY PATTERSON
Uno de los narativos manko konosido era el de «John Henry Patterson», un aventurero ke se topo djusto en el nasimiento del Sionismo. Era el lider nomado «Zion Mule Corps» una Brigada Judia. Su istoria kapturo la atension del eskrivano «Henry Lew» ke eskrivio 7 livros antes de avlar kon Patterson. Le sorprendio de ver a Patterson entrar en el Universo Judio i de aharvarse al lado de 2 Sionistos grandes komo en la Kampanya de Palestina en 1914-18. El Leftenente Kolonel Patterson entrenava a los OLIM de la Rusia a ser gerreros i para «Zeev Jabotinsky» era el primer aliado de los Judios. Lew ke eskrivia sovre temas Judios, empesava kon la trauma del Olokosto, indo asta los ke bushkavan azilio en muestros tiempos. Patterson era konosido komo un soldado onorable Britaniko. El autor del livro «Men Eaters Of Tsavo» tenia un kuento de liones salvajes komiendo a los ovreros en la linya del tren en Kenya en 1898. Djusto en este tiempo, Patterson estava en difikultad kon el Establesimiento Militar Britaniko por su aventura ke tuvo kon una mujer de klasa alta en un Safari en Afrika. El marido kometio suisidio i kuando empeso la Primera Gerra, el ofresio sus servisios en la Armada Britanika en Londra i Fransia. Al ser rechazado, se torno al kolego estasionado en Ejipto. Le disho ke tenia una sola posibilidad ke era entrenar a los Aznos Judios indo a Galipoli. Eran soldados jovenes Judios Rusos ke los Turkos avian echado afuera de Palestina. Seria por la primera vez desde «Shimon Bar Kochva» en 135CE ke los Judios tenian una armada. Esta mision era una mision ke lo metio en kontakto kon el Sionisto i Aktivisto Judio Ruso «Jabotinsky» i kon «Joseph Trumpeldor», kon la idea de formar el «Zion Mule Corps» konteniendo sienes de ombres. Servio kon distinksion en Galipoli en 1915. Jabotinsky dizia ke era una figura remarkable Kristiana ke muestro puevlo venia de konoser por la primera vez desde 135CE. A esto fue adjuntado por Lew ke Patterson no avia enkontrado un Judio asta ke tenia 47 anyos. Patterson pensava ke estos Sionistos eran bravos i intelijentes komo los soldados en la Armada Britanika. Por el resto de su vida, Patterson se kedo kometido al Sionismo i eskrivio el livro «With Zionists in Gallipoli» mostrando ke los Aznos Judios traian la komida i la agua a las trenchas i tomavan a los feridos atras a los barkos. Disho ke sin eyos seria imposivle de terminar la kampanya en 8 semanas en lugar de 8 mezes. En Galipoli Patterson estava en karga de la Segunda Lejion Judia ke lo akompanyo a Palestina. Fueron un ayudo grande para el jeneral «Edmund Allenby» en el otro lado del rio Jordan. topando un kamino mas fasil a Damasko i Amman. Entretiempo sus ombres eran sometidos a un tipo de Antisemitismo brutal i esto tuvo un efekto en la kariera de Patterson al no poder resivir su promosion.
Kuando se fondo «Keren ha Yesod» en 1920, Jabotinsky le demando a Patterson de irse a 60 sivdades en Ingletierra, USA i Canada para arekojer fondos i el lo izo de korason sin resivir un salario. Trusho personalmente miliones de Dolares. Allenby i sus subordinantes eran Arabistos i kerian ke la Deklarasion de Balfour sea anulada. Ayudaron mismo a Lawrence de Arabia a ser un kulto o una leyenda. Patterson se murio en 1947 i en su testamento, demando de ser enterrado en el Estado Judio de Palestina.
Jabotinsky fue enterrado ayi en 1964 i Patterson en 2015, en un sementerio serka de Netanya.
Trezladado por Shimon Geron, Sydney
Fuente: Ladinokomunita
