eSefarad Noticias del Mundo Sefaradi
La relasyon de los evropeos kon la uma djudia deve ser analizada en la istorya de su kontinente. Miles de anyos los djudyos fueron persekutados en este kontinente dezde de la Espanya medyevala kon su sistema de enkizisyon fina la Shoa en la kuala 6 milyones de almas sin pekados fueron matadas por los nazistos. Despues de la segunda Gerra Mondiala la Evropa keryendose deskulparse de los krimen, las injustisyas ke kometyeron desidyeron de apoyar la idea a ke Israel se krea. Ma en estos dalkavos anyos se remarka ke siertos payizes evropeyos miran de alesharsen de la idea de suportar Israel achakes del konflikto israelo-palestiniano.
Sozde ke en keryendo kritikar la politika de Israel un muevo antisemitizimo da rayizes en la mentalidad evropeya. El aborresimineto del djudyo oy en dia se manifesta komo una obsesyon de inimistad kontra Israel. Kuando las institusyones evropeyas meten al mizmo rango del rejimen apartayd Israel i la Afrika del Sud no solo dan una informasyon falsa ma trokan la realita istorika. Israel es un estado demokratiko onde djudyos, arabos, druzes i cherkeses biven en armoniya tenyendo los mizmos derechos de sivdadinos.
Un otro duble standard de la politika evropeya es la influensa de la medya i la prezensya del lobi pro-palestiniano. Tal la BBC o el jurnal Guardian dan de manera negativa el portre de Israel i pasan en kayades el terorizmo palestiniano. La Ajensiya Internasyonala de Dezvelopamiento Amerikana USAID en investigando su pasado establisyo ke el dinero del kontribuavle amerikano fue dado sin razón a la BBC i a organizasyones islamistas i mizmo al Hamas sovre la influensa del lobi palestiniano ke falsifyo kon maestreriya la destinasyon de los fondos.
La opinión publika evropeya esta ansi entosegada kon la narasyon negativa de Israel ke es konsiderado komo una fuersa de okupasyon sin tomar en konsidersyon la kompleksita del konflikto. Ademas munchos de los politikos evropeyos para darsen a kerer bien por los nombrozos muzulmanos biviendo en evropa se atrivan a kritikar Israel koza ke no les kosta. Es evidente de ver la ipokrisiya ke egziste en la Irlanda, en la Suedya i en la Beljika onde la kritik de Israel eskonde un antisemitizmo fuerte. En estos payizes malorozamente el djudyo deve de guadrar sus orijin en no mostrando dingun sinyo relijyozo. Los politikos inglezes kritikan i miran de dar lesones a Israel de no kerer respektar la Ley Internasyonal en sus aksyones en Gaza ma por kontra no dizen ni una palavra sovre las violasyones de otras nasyones tal la China ke opresa los Uygures en Asya.
En los dalkavos 20 anyos las relasyones entre Israel i las mas importantes nasyones evropeyas fueron karakterizadas kon altos i bashos ma siempre al dezavantaje del estado djudyo. Siempre estos payizes miraron a tratar kon Israel a un nivel basho. De una vanda estas nasyones evropeyas dezvelopan i mantienen relasyones ekonomikas, siantifikas, de defensya i de seguridad kon Israel ma de la otra vanda lo djuzgan negativamente en relasyon kon la situasyon en Yehuda i Shomron i su lucha kontra el Hamas en Gaza. Malgrado ke estas nasyones topan justo la lucha de Israel en Gaza eyas, no mankan de darle lesyones de komo komportarse en kritikando de no respektar las konvansyones de Geneve. Kuando la Rusiya envadyo la Ukranya la mayoriya de los payizes evropeos impozaron penalidades a Moscow en boykotando los produktos rusos i dando un ayudo ekonomiko i stratejiko illimitado a Kiev. Kuando fue el kavzo de Israel ke ampeso su lucha kontra el mal teroristo islamo-fundamantalisto en Gaza, en el Libano i en la Siriya los payizes ke azen partida de la Unyon Evropeya no solo se abstenyeron de dar sus apoyos ma en munchas vezes no mankaron de kondanar Yerushalayim en sus aktos, en impozando kastigos diplomatikos i militares. Sin dinguna verguenza uvo mizmo politikos evropeyos ke yamaron al boykot total de Israel.
En estos diyas la prensa mundial no se keda de publikar i filmar al prezidente Trump de los Estados Unidos en dando sus deklarasyones sovre su politika mundiala i sovre la situasyon entre su payiz i los payizes evropeyos. El les dize ke 300 milyones de amerikanos no se van sakrifikar a defender 500 milyones de evropeyos kontra 140 milyones de rusos. Esta proteksyon tiene una fin i esta fin ya vino a eskadensya. Mas a la eksepsyon de Israel ni un dólar no se va gastar para protejar otras nasyones ke tienen la kapachita de defendersen komo los evropeyos.
Buen diya keridos evropeyos, sin mas tadrar, espertavos i toma leson de Israel para ambezar a vuestras muevas jenerasyones de sivdadinos komo defenderse kon las muevas teknolojias militares ke pokas nasyones posedan. Respekta i ayuda Israel a venser el terrorismo arabo si keresh ke biva i ke vos de su asistensya kontra la Rusya oy i kontra la China en pokos anyos a vinir.
Dr. Selim Salti
