FALSE PREMISES/Una baza falsa trezladado al ladino por Simon Geron

El artikulo siguiente aparesió en el»Jewish News» i se trata de la Doktoresa «Ann Drillich» kontando su istoria a «Peter Kohn»

Es una istoria ke tiene ke azer kon bienes Judios konfiskados por los Nazistos i los Komunistos, trokando de mano. Un proseso ke tomo anyos para rekuperar estos bienes.

La Doktoresa «Ann Drillich» sera kisas la sola Judia a ken le apartiene una Iglesia Katolika operasional. Sus avokatos están luchando kon los Polakos sovre los bienes de su famiya en tiempo del Komunismo en Polonia. Su madre ke se avía echo orfelina «Blanka Goldman» avía heritado todo después del Olokosto en «TARNOW/Polonia». Parte de su famiya fue matada en el Olokosto i parte grande de los bienes fueron konfiskados de manera ilegal. El terreno tenia una iglesia ke fue konstruida después.

Ann Drillich da lesiones de medisina en la Universidad de Melbourne i tiene la sivdadania de la Australia i de la Polonia. Lo ke se pasa es ke el Governo Polako de oy i la sivdad de TARNOW se están harvando para guardar este terreno. La «Casa Gumniska» menos de un kilometro de Tarnow es un sentro antiguo en el kamino ande se topavan los bienes de la famiya. En un lado estava la kasa de Goldman. Al lado avía el Salon de Deportes. Se yama «Palacio De Casamiento». Despues venia la Iglesia kon la Torre. En frente se topava un auto-park i alrededor un terreno vazio. En soma estas tierras konfiskadas entre 1959 i 1986 tenían la dimensión de 2.5 Hektares.

Blanka Goldman bivia con su famiya «Goldamanowka» konsistiendo de la Kasa de Famiya, de una Villa i Jardines Grandes. Avia una fabrika, kasas i tierras de agrikultura. En Noviembre 1941, Blanka kon su avuelo Itshak, los parientes Efraim i Anna Goldman i su tía Emilia Feuerstein se toparon echados afuera por los Nazistos, forzados a ir al Getto de Tarnow. El avuelo murió después de 3 mezes i sus parientes kon la tía fueron matados en Septiembre 1942. Blanka a la edad de 18 anyos se topo sola. Esta trajedia la avía harvado emosionalmente por la vida. Blanka se fuio del getto kon el ayudo de»Hubert i Hildegard Poetsche» de una famiya Katolika Alemana [Volks Deutsch]. Eran Nasionales de Okupasión i eyos le permitieron ke se kede en la kasa. Blanca se eskondia debasho de esta kasa.

Despuse de la Gerra, Blanka herito la propriedad. En 1948 partió de la Polonia i se kaso con «Henry Drillich». En 1954 imigaron a la Australia. Antes de kitar el pais, Blanca dio a «Hubert Poetsche,» el poder de administrar los bienes de Goldman. Esto se paso después al ijo «Jetzy». En 1975 echaron afuera a los Poetsches las autoridades. Despues la «Casa de Goldman» se torno al «Palacio De Casamiento». En 1985 el Tresorio del Estado se la yevo basho el Akto de aver abandonado a este lugar.

En 2010 «Ann Drillich» empezó a tomar una aksion legal para rekuperar sus bienes. Topo ke el amigo tan bueno «Jerzy Poetsche» avía traisionado a su famiya. En 1986 el i la iglesia disheron ke eran los duenyos. Poetsche avía echo una donasión de 8600 metros kuadrados, vendiendo la otra mitad a la iglesia. Todas estas transaksiones eran eskondidas de los Drillichs.

Sin saver del rovo, en 1994 «Henry Drillich avía nominado a Poetsche komo el «JUSTO DE LAS NASIONES» en YAD VASHEM. En 1993 era nominado «EL JUSTO» en el Museo del Olokosto en Varsovia. Despues de una batalia grande, en 2013 los bienes se dieron atras a la famíya. Esta vez la Sivdad de Tarnow las reklamo porke durante 30 anyos los Drillichs no avían reklamado esto. En 2014 la iglesia reklamo a este lugar i fue rechazado. Ansi es ke Drillich se va a la korte en siendo la duenya. Eya kondena la apropriasión ilegal de los bienes. Ma todo lo ke se paso durante el Olokosto la avía tokado. kuando su ermana tenia 16 anyos, eya tenia 13 anyos. Engrandesiendo en Melbourne topo a su madre Blanca muerta al tornar a la kasa. Se avía suisidado. Mismo oy si los Polakos rekonosen la Istoria Judia i si mismo se puede kaminar en Yalmulke en las kayes de Varsovia, se trata de la kestión ke es kaji imposible rekuperar los bienes rovados de los parientes i avuelos. Ann Drillich aspera ke la Kaza de Famiya será un día un Museo de la Istoria Judia. O un sentro de kultura i edukasión.

Aki el Sentro del Olokosto konose a muchas istorias indjustas i las barrieras ke se meten en kamino kuando se reklama algo.