Eskapar la eskola primera por Nissim Ashkenazi

El 30 de djunio, es el ultimo diya de las eskolas, i el empesijo de las vakansas de dos mezes.

Para mi inyeto, esta salida a la vakansa, tiene sinyifikasion mas profunda. Es eskapar sesh anyos de la eskola primera, i pasar a la segunda eskola, kon otros amigos i otros maestros, lugar diferente, direksion mueva, i trokar lo ke estava uzado, i empesar ambezos i aires diferentes.

Todo este trokamiento no es liviano para los chikos. Los devemos enkorajar i saportar para ke este pasaje sera kalmo. Los anyos de alkavo eran yenos kon difikultades, achakes de la pandemia i las gerras. La parte de las lesiones eran via zoom, ke es manko reushido.

La seremonia de los elevos ke eskaparon la eskola, es muy alegre i muy esmoviente, yena de lagrimas de las madres.
A la seremoniya los elevos pasan enriva de un tapet korelado, (komo los prezidentes, reyes, modeles, i aktores) a los dos lados los elevos ke tienen de estar otro un anyo a la eskola. Estan todos los parientes i ay muzika, i van akompanyados kon los maestros i maestras asta la salida de la eskola, ke es la vez de el kavo ke salen del lugar konosido i protejado, i suvir otro un eskalon en el ambezo de la vida.

Las lagrimas ke kayen en esta seremonya amostran la alegriya kon el miedo del avenir.

La parada es kon muzika, palmas, flores, regalos, tiros de konfeti, (papelikos de kolores) i lagrimas… Hayde, se van al restorante, i empesar la vakansa.

Suetamos reushida buena a todos los ijos i ijas, i esperamos kon grande dezeo ke venga la pas i la trankilidad.

Abraso fuerte a todos.
Kon amista.