Las Notas de Matilda – Kantadores de la tradisión djudeo-espanyola: Rivka Raz

Kada martes, Matilda mos kontara sovre los kantadores y kantadoras de la muestra muzika.
Los tekstos ke kompartimos koresponden a los programas de la seksion en ladino de Kol Israel del siklo ke eya mizma melda kada djueves.

Rivka Raz
(Yerushaláyim)
De Tapuz – Ladino

Rivka Raz nasió en Yerushaláyim en una famiya sefaradia. De su chikés absorbió la kultura del ladino en la kaza de sus djenitores. En djoven edad estudió balet i kanto.  Durante el periodo de la armada en el 1956, eya fue ofisiera, i sirvió komo shefe de prizión de soldadas. En el mizmo tiempo kontinuó a kantar en ebreo i en ladino en las fiestas familiares En una de estas fiestas en el 1963 estava prezente Nahum Slonim, ke era akel tiempo produktor de teatro i  imprezario  de Shimón Israeli, las reprezentasiones del kual tuvieron un grande suskseso. Slonim envitó a Rivka a partisipar en una de las reprezentasiones de Shimón Israeli i Shayke Ofir, de nombre «Shin shin». Después de mezes ke Rivka partisipó a estas reprezentasiones eya fue yamada a la audisión para la komedia muzikal «My Fair Lady», echa por Giora Godik, i resivió el rolo prinsipal. La komedia fue reprezentada en el 1964 en Israel i tuvo un sukseso sin presedentes. Los jurnales proklamaron a Rivka una «estrea nasiente». Un anyo después eya fue envitada por el famozo moderador amerikano Ed Sullivan a kantar en su programa de televizión. Esta performasia le avrió el kamino para azer karriera al estranjero. De entonses eya partisipó en Israel i al estranjero en diezenas de piesas i komedias muzikales, festivales i konsertos, ke tuvieron muncho sukseso. Su fotografia aparesió en diezenas de primeras pájinas de jurnales. Eya ganó unas kuantas vezes el Premio «Kinor David», sea komo kantadora sea komo la mijor aktrís teatral del anyo. En el 1970 Rivka  tornó  al lugar de su chikés, kuando fue envitada por el Teatro Bimot a partisipar en el rolo prinsipal, al lado de Avraham Mor, en la piesa de Yitzhak Navón «Bustán Sefaradí». La piesa i sus kantes en ladino tuvieron un enorme sukseso. Poko después eya se transfero a morar en U.S.A. En el 1978  fue envitada a partisipar al filmo «Zamar sefaradí 1978 taor», ke konta la maraviyoza istoria de los djudiós sefaradís, filmo ke tuvo un grande sukseso. Un anyo después eya fue envitada  a Israel por «Kol Israel», para partisipar kon otros kantantes a un programa spesial en memoria de Isaac Levy, ke dedikó su vida a la rekolta de sienes de kantes, imnos i romansas sefaradís. De este programa fue echo un disko ke tuvo muncho sukseso. La última produksion de Rivka Raz es un Cd dopio, entitolado «Kanto sefaradi puro – Los kantes ermozos de Rivka Raz»,  kon un libretto de 48 pájinas, ke enkluye las biografías de Rivka Raz mizma i de Isaac Levy, las palavras de las kantigas kon traduksión al ebreo, i diezenas de fotografías.

 «Nani nani», kantada por Rivka Raz