Entrevista kon Matan Stein, Director de la Autoridad Nasionala del Ladino i su Kultura en Israel

Rezume de la entrevista

Yo me nasi en Yerushalayim en la shehuna de Maalot Dafna.  Dezde mi chikes me engrandesi en Ofra, ke es una lokalidad, un kazal al norte de Yerushalayim, i ainda moro ayi.

Yo no puedo dizir ke avlo Espanyol muy bien, ainda no, tengo de amejorar mi Djudeo-Espanyol, mi Espanyolit. la grande parte de loke yo se, la ambezi solo, kon la ayuda de muncha djente ke me ayudaron. Me ambezi en la Univesidad Ebrea, ande el Prof. Bunis, me ambezi kon la sinyora Medi Koen-Malki, ke es una profesora de Ladino, una profesora muy buena, tuvi el mazal grande… tengo el mazal grande ke lavoro aki en la Autoridad Nasionala del Ladino, i lavori…lavorava kon la sinyora Dolly Burda, muestra sekretaria tan amada i kerida, ke malorozamente mos desho i salio a pensia, i eya me ayudo, me ayudava, muy muncho ambezarme la lingua, meldarla, a vezes echavamos lashon en Ladino, i esto es! En esta manera yo amejori mi Ladino, i ainda yo amejoro mi lingua.

Esta es la razon, porke ya vini aki, lavorar aki. Yo kreigo ke la Autoridad es el instituto mas emportante en este kampo de promover el Ladino i kiji kontribuyir para alkansar este buto. Aun ke yo so de una famiya eshkenazi  i no de una famiya sefaradi, el Ladino, i tambien las otras linguas djudias son muy emportantes para mi, i kiji kontribuyir a este kampo. Por esto kreyi un kurso del Ladino en linia, venti lisiones para prinsipiantes bazadas sovre el livro de Moshe Shaul, el ex-vise-prezidente de la Autoridad del Ladino, ke tambien me ambezo muncho, i kontribuyo a mi saviduria del  Ladino, se puede topar las lisiones en Youtube. Kon la sinyora Dolli Burda publikamos una revista kulturala en Djudeo-Espanyol  ke se yama ‘Orizontes’ kon la kollabrosion de munchos Ladino avlantes  en el mundo entero, de Ardjentina, Kosta Rika, Turkiya, Espanya, Israel i Serbia, i endjuntos kreimos una shena literaria, de poezia, literatura de kuentos i konsejas, i espero ke puedamos kontinuar kon este proyekto, ke mostra ke el Ladino ainda bive, i ke pueda kontinuar a bivir en el avenir tambien.

Oy en dia tengo, baruh ´hashem, sinko kursos del Ladino en el paiz entero.  Ay elevos muy muy buenos del Ladino, kantamos endjuntos, meldamos konsejas, avlamos, echamos lashon. Eyos son elevos muy seriozos i lavoran fuerte para ambezarsen la lingua i esto muy orguyozo de ser sus profesor. Es vedra, ke no es mi lingua maternala, yo avlo tambien el Yiddish, ke tambien no es mi lingua maternala, son dos linguas ke me ambezi, ke esto ambezando, ama no me importa, porke me siento ke ay de azer alguna koza, i yo tengo una oportunidad de ayudar a la salvasion, se puede dizir, de estas dos linguas, i espesialmente del Ladino. El Yiddish bive, tiene munchos avlantes ande los haredim, ay munchos eshkenazim ke ainda avlan el Yiddish o a lo manko pueden komunikar en esta lingua. El Ladino, avagar avagar, piedre mas i mas avlantes. Aunke no so un avlante nativo, kreigo ke puedo kontribuyir un poko. El anyo ke viene tengo i los sinko kursos de Ladino i sinko kursos de Yiddish, i komo tengo la revista en Ladino, eskrivo a una revista en Yiddish tambien. Tengo un es.huenyo , es un sekreto entre mozos,  de avrir una shkola de linguas djudias en Yerushalayim, de djudeo-espanyol, Yiddish, djudeo-arameo, djudeo-arabo i de todas estas ke son una parte de  la kultura djudia i de la identidad djudia, de muestro DNA djudio. Espero ke, ishalla, un dia pueda avrir esta shkola en Yerushalayim, muestra sivda eternala, el sentro del puevlo djudio.

Durante el tiempo, este es mi hobby de ambezarme linguas i fina oy me ambazi, se puede dizir, kaji venti  linguas, ama puedo avlar i komunikar en diez de eyas, porke las otras linguas son linguas muertas. Penso ke kada lingua es un mundo entero de kultura, de pensamientos, de amor, de sekretos, i ambezarse una lingua mueva es komo avrir una puerta serada.