eSefarad Noticias del Mundo Sefaradi
Ver todos los artículos de esta sección >>
_________________________________________________________
80 anyos de la asemblia de Evian
Entre 1933 i 1941, los Nazistas kijieron forsar a los djudios ke salgan de la Almania para azer el pais judenrein (alimpiado de djudios). En primero izieron difikultades i reglas diskriminatorias, asta ke en 1938, 150,000 djudios Almanes, 25 % de la povlasion djudia de 1933, ya se avian ido de ayi. Ma, en marso 1938, kuando Almanya anekso la Austria, 185,00 mas personas se adjustaron a la povlasion djudia debasho dela autoridad nazista. Esta ves, los djudios ke se kijieron irsen no toparon paizes ke los kerian resivirlos.
Los djudios alemanes i austrianos ke kijeron emigrar a los Estados Unidos no pudieron obtener las visas menesterozas. Aunke ya se savia las persekusiones nazistas kontra los djudios, sovre todo ke los haberes (las notisias) de Kristalnacht («noche de vidros rompidos») ya fueron anchamente publikados, los Estados Unidos de l’Amerika no kijo akseptar a los refujiados djudios. (La ley de 1924 ke limitava el numero de imigrantes al pais diskriminava kontra grupos etnikos konsiderados «non-dezeados.”) El presidente Franklin D. Roosevelt, en repuesta a presion politika propozo de unir una asemblia internasional para diskutir el «problem de los refujiados”, ke es los djudios ke estavan perkurando de fuyirsen de los nazis.
Del 6 al 15 julio de 1938, delegados de 32 paizes se reunieron en Évian-les-Bains, Franisa, i prezentaron sus ideas. Avia tambien 24 organizasiones voluntarias “observadoras”, i 200 jurnalistos de varios paizes. Golda Meir, ke representava komo “observadora” el Mandato Inglez de Palestina, no fue permetida de avlar.
Hitler mando a dizir ke si los paizes ivan a resivir a “estos kriminales” (los djudios) el iva ayudarles a ke se vaygan de su pais, “mezmo en vapores luksiozos”!
Durante los 9 dias de la asemblia, reprezentante atrás de otro avlo kon simpatia por los djudios, ma dingun pais (aparte de la Republika Dominikana) aksepto a resivir ni un djudio.
Ansina ke alugar de ayudar, esta asemblia sirvio mas komo una buena propaganda para Hitler.
Bazado sovre informasiones de THE EVIAN CONFERENCE i Évian Conference
Foto del Hotel Royal en Evian ande tuvo lugar el kongreso
Rachel Amado Bortnick
Dallas, Texas
Ladinokomunita
______________________________________________________________
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.
