eSefarad Noticias del Mundo Sefaradi
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.
Ver todos los artículos de esta sección >>
Meldando sovre un kongreso akademiko,
i un livro de 1891 sovre mujeres de Turkia
Una koza me yeva a otra, komo una kadena. Judith Cohen disho (en repuesta a la propozision de Leon Benatov) ke la Society of Sephardic Studies iva tener un kongreso en Barcelona el enverano. (la SoSS ed del Instituto Ben Zvi en Yerushalayim.) Yo fui al Internet a ver kualo sera el program, ma me empesi a embelekar en meldando los programes pasados, los abstraktos (rezumes) de las ponensias, i de ayi fui a meldar los tekstos enteros de algunos ke estavan disponivles. Me entereso sovre todo el kongreso del mayo pasado (tuvo lugar en Evora) ke tenia el tema: «EL ENCUENTRO DE LOS JUDÍOS DE SEFARAD CON EL ISLAM Y LOS MUSULMANES.»
Los «abstracts» – lo mas en inglez, algunos en espanyol, portugez o fransez – se topan en sefarad-studies.org
A mi me enteresa muncho saver kualo estan investigando los akademikos, i me alegro de ver todo lo bueno ke estan kitando en medio, sovre todo ke por mas de 500 anyos pokos se avian enteresado en todo esto. Ke bueno si podiamos meldar todo lo ke disheron!
En fransez, Gérard Nahon, (de la Sorbonne, Paris) avlo sovre Istanbul en el siglo XVII. En bushkando su artikolo (Istanbul Metropole Orientale de la Diaspora au XVIIe Siecle: Quelques Temoins Français ) topi este sovre «Judaisme medieval et moderne«, si vos enteresa.
La Dra. Hilary Pomeroy (de University College,Londra) avlo de dos livros, eskritos por dos inglezes del siglo 19, ke tratan de la vida de mujeres djudias en tierras muslumanas, el uno en Maroko, el otro en Turkia. Yo fui bushki el de Turkia (eskrito de la ingleza Lucy Garnett) i topi ke esta enteramente disponivle en Internet! Se yama «Women of Turkey and Their Folklore.» Siguro me meti a meldarlo.
Ke dezendenyo ke tiene esta por los djudios!!! Avla mas muncho dede Salonik, ande los djudios eran la majoridad, i lo mas proves i suzyos, ma ke fue una kuriozidad ke kuando vino la epidemia de kolera, eyos no la aferraron, ni se izieron malos, kuando los ke bivian en mas mijores sirkunstansias (mas rikos) sufriyeron i tuvieron muertes de esta malatia. (Dize ke es porke a los djudios les agrada azer todo afuera, «au plein air», ke las mujeres todo lo ke pueden a azer por afuera de sus kazas – komo si esto es una koza negra!)
Asigun lo ke entendi, es ke i el otro livro (sovre Maroko) tiene el mizmo prejuisio kontra djudios, i ke Hilary iva eksplikar ke esto es la konsekuensia ke los autores no konosieron djudios en Ingliterra.
En todo kavzo, Garnett deskrive otros kavzos kon mas muncha objektividad, komo la akuzasion ( «kalumnia de sangre») en Izmir de los gregos ke akuzavan a djudios de aver matado kriatura kristiana para azer las ma[t]sot.
Rachel Amado-Bortnick
Dallas – Texas
Fuente: Ladinokomunita
