eSefarad Noticias del Mundo Sefaradi
Ver todos los artículos de esta sección >>
_________________________________________________________
Sinagoga medieval debasho de una butika en Ingletierra
En el mundo ay algunos lugares ke verdadmente tienen una istoria djudia kuaje totalmente eskondida. Ma de ves en kuando un jurnalisto los topa i mo los aze saver, grasias al Internet. Ansina podimos meldar ke en la sivdad de Guildford, Ingletierra (mas de 40 km. afuera de Londra) debasho de un magazen de ropas yamado Monsoon, se topa restos de una sinagoga medieval!
Monsoon Shop
Asegun el artikolo «Guildford Medieval Synagogue» en 1996, durante una renovasion ensupito toparon de debasho de la tierra una kamareta muy vieja, ke los arkeologos determinaron es de una sinagoga del anyo 1180 – seguramente es la mas vieja sinagoga en toda Britania.
La kamareta era adornada kon kuatro kolinas, alkovas (alcoves), i un banko de biedra al deredor entero de la kamareta, i un taban (suelo) de lajas, lo ke da sinyos de ser un lugar importante.
Toparon eskalones de piedra abashando de la kaleja medieval a esta kamareta, lo ke amostra ke esta sinagoga fue siempre un lugar sekreto. Esto se puede entender, porke komo ya savemos, la istoria de los djudios de Ingletierra en tiempos medievales fue muy trajika. Eran konsiderados la propriedad del rey, opremidos, persekutidos kon leyes antisemitas, asta ke en 1290 el rey Edward I sinyo su Edikto de Ekspulsion i arondjo a los djudios del paiz enteramente. Asegun los arkeologos, la sinagoga de Guildford fue abandonada en 1270, en el tiempo mas espantozo para akeos djudios.
Despues del deskuvrimiento de esta sinagoga, pensavan meter un suelo de vidro en le magazen para poder mirar a los restos de la sinagoga antigua de debasho, ma no lo izieron, i oy solo se puede ver fotografias, i algunos artefaktos de la ekskavasion.
Depsues de meldar este artikolo, topi en Wikipedia mas detalyos enteresantes ovre esta sinagoga eskondida. Al este de la kamareta ay un alkova i una kolona kon sinyos de kemaduras (fuin, al pareser) mostrando ke ayi kemava una flama, i se supoza ke ayi estava el Aron Akodesh i ke las kemaduras eran del Ner Tamid.
Oy, en la mueva sinagoga de la sivdad ay una laja de la antigua kehila, regalo del Muzeo de Guilford. Esta mueva se fraguo en 1979, inaugurada i konsakrada por el Gran Rabino Immanuel Jakobovitz.
El artikolo mos aze saver ke aunke no ay muncho de ver de la sinagoga vieja, vale la pena una vijita a la butika en Guildford por sus restos ke reprezentan la opresion istorikos de los djudios en Ingletierra.
——————————————————-
Rachel Amado Bortnick
Dallas, Texas
Ladinokomunita
______________________________________________________________
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.
