En vista de Rachel: Rosina Karako Smeraldi, z’l (1938-2012)

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.

Rosina Karako Smeraldi, z’l (1938-2012)

Muestros amigos Liliana i Marcelo Benveniste, editores de eSefarad, dedikaron el Boletin Nº 171 a la bendicha memoria de Rosina Karako Smeraldi, ke mos desho la vida el 21 Marso 2012 (27 Adar 5722.). Rosina, ke este en ganeden, era siempre “de kara de munchos amigos” (komo deziamos en Izmir) i se despartio en siendo kerida i apresiada por sienes de personas de todas partes del mundo. Yo personalmente kada dia siento su mankura.

La vida de Rosina paso por varias etapas, eksperiensas, I lugares muy diferentes, I no se puede resumir en unas kuantas linyas. Ma, en akodrandomos de eya, kreygo ke vale la pena empesar kon unos kuantos datos basikos de su vida.

Nasio el 27 Marso 1938 en Plovdiv, Bulgaria, sivdad ke entonse se yamava Filibe, ma en pokos mezes la famiya se transfero a Estambol, Turkia, i es ayi ke se engrandesyo, i estudio en la eskola Italiana de la sivdad. Por esto eya konosia el Italiano muy bien, ma kuando vino a la Amerika (New York) en 1964 kon su primer marido i ijiko Jack, no savia inglez. En poko tiempo se ambezo la lengua i lavoro komo narsa en un ospital psikiatriko. En los kavos anyos era kazada kon Gomy Smeraldi, Italiano de orijin, i bivia en Florida. Su alegria era su famiya, su ijo i dos inyetos, I sus munchos amigos de las sosiedades de bienfezensia ande lavorava komo voluntaria.

Por sus munchos anyos de servisio, Hadassah la nombro komo “Mujer del Anyo” (Woman of the Year) en 2009. Era fondadora, djuntos kon su ijo Jack Karako, del Sephardi Federation of Palm Beach County (Florida), el kual la onoro el anyo pasado, a la okazion de los 20 anyos de esta organizasion.

Era en el SFPBC ke Rosina konosyo a David Siman (z’l), un ombre ekstraordinaryo ke era profesor de Espanyol, ma siendo kazado kon una sefaradiya Estamboli, konosiya el djudeoespanyol a la perfeksion, I ensenyava la lingua tambien. David, ke este en ganeden, fue tambien mi kolaborador para fondar Ladinokomunita en 1999, i uno de los primeros moderadores. Achakes de el Rosina se enskrivio en LK en Avril de 2000, I empeso eskrivir kon grande entusiasmo I alegria de komunikarse kon otros en el mundo de su lengua I kultura. I en 2002, kon la rekomendasion I el tutelaje de David Siman, se izo moderadora de LK tambien.

Rosina eskriviya en LK kuaje kada dia (en total eskrivyo 2535 mesajes, sin kontar las notas i repuestas ke metiya debasho de los mesajes ke moderava) i perkurava de animar las komunikasiones. Kontava de aki de aya, demandava, respondia, i siempre enkorajava a otros de eskrivir I de kontar tambien. Kuando korijava los yerros ke via en los mesajes, algunas vezes el eskritor se araviava. Ma eya, kon su modestia I buena umor, podia kitarlo en bueno.

Su buen umor estuvo kon eya mezmo durante los muy duros dias de tratamientos, i a vezes se burlava de los “cocktails” (de melizinas) ke estava tomando, I dezia komo se iva “ermozeyar” kon el kimo. Yo le rogava ke no se okupe de moderar LK por unos kuantos dias, ke tenia menester de repozarse, i eya me dezia: “no me tomes este plazer de mi mano!” I fue ansi ke asta kaje la ultima semana, eya kontinuo a eskrivir I a moderar en LK. La kava ves ke sinti su boz por telefon eya avia tornado del ospital I estava muy flaka. Me disho: “Me vo repozar dos dias antes de okuparme de LK.” Kuatro dias despues mos desho la vida. Fue un grande shok para todos los 1350 miembros de Ladinokomunita de 42 paizes del mundo* I el foro se incho de mesajes de tristeza, kondoleansias, I kerensia para la deskansad! Disho Buly Hazan de Arjentina en su mesaje, ke la mijor onor a Rosina es de mantener el foro bivo i aktivo, komo lo azia eya. No ay mijor ekspresion de la erensya de Rsoina, ke sitar los biervos de su primer mesaje a Ladinokomunita, datado del 30 Avril, 2000:

Me alegro de meldar tantos messages en la lingua ke me paresio ke ya se estava muriendo. Toka a mozotros de deternerla en vida en kontinuando a eskrivir.
Salud buena a todos
Rosina K. Smeraldi

Vamos a azerlo, Rosina, a tu bendicha memoria. Repoza en paz.
Rachel

Aki, en inglez, vos paso el mesaje eskrito de la prezidente aktual del Sephardi Federation of Palm Beach County, Rose Papo Allen:

“The passing of Rosina Smeraldi Karako has been very difficult for the members of The Sephardi Federation of Palm Beach County in Florida. We lost a dear friend and a unique individual. This is our 20th Anniversary year and we had just feted Rosina and her son Jack in December at our Annual Luncheon for their vision and leadership in founding our organization! Rosina was really an icon for us; she embodied the vitality and the warmth of Sephardic hospitality. Her personal story was truly a perfect example of the wandering and diverse, adaptive life of our entire history. But most important was Rosina’s passion for Ladino and her vivid memory of the last generation of traditional Sephardic home life. She was a cultural treasure. While we grieve this immense loss for our community and for her beautiful family, we have also rededicated ourselves, in her honor, to continue as long as we can to perpetuate her original mission: to keep Ladino alive and to share our love for our Sephardic roots. Rosina lived life to the fullest and accomplished so much. We remember her with these lyrics from a Ladino lullaby – “Durme, durme, ermoza donzella, durme,durme, sin ansia i dolor. Durme, durme con paz con savor.”

Rose Pappo Allen, president Sephardi Federation of Palm Beach County

Rachel Amado-Bortnick