En vista de Rachel: LUNA KOLORADA: ESPERANSA PARA GILAD SHALIT?

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.  
 

LUNA KOLORADA: ESPERANSA PARA GILAD SHALIT?

 
Kreygo ke todos ya konosemos el kavzo malorozo de Gilat Shalit, el soldado Israeli ke fue sekuestrado de Hamas 4 anyos atras, i ke dainda dinguno save su estado, o mezmo si esta en vida, porke Hamas  no permetio akseso a la Kruz Kolorada (Cruz Roja, o Red Cross.) i ya vos akodrash ke en Israel, en el 7 djulio, 2010, tuvo lugar un konserto de apoyo para el, kon la prezensia de sus parientes, Noam i Aviva Shalit, i asistido de miles de personas, ande la orkestra fue dirijida por el famozo maestro Zubin Mehta.
 
Un grupo de la Itahdut Yotsei Turkia (Union de Emigrantes de Turkia) estavan tambien prezente, kon sus otobus, i pankartas en turko i ebreo. Avia tambien aya un jurnalista turko, Cinar Ozkay, ke eskrivio sovre esto todo en el diario Milliyet, akompanyando su artikolo kon dos fotos, una del jurnalista  kon Zubin Mehta- ke le dize ke dezea venir a Turkia – i una de vista jeneral del konserto. 
 
Solo en este artikolo se topan siertas deklarasiones i haberes (notisias) kon el potensial de resolver la dilema de Gilat, i tener munchos otros benefisios tambien.

Los ke saven en turko pueden meldarlo en el diario Milliyet 

“Puede ser Erdogan puede salvar a mi ijo”

Esto es la traduksion del titolo prinsipal del artikolo. 

El eskritor mos dize ke lo saludo al Sr. Noam Shalit, i le demando si tiene algun mesaje para los turkos, i el Sr. Shalit le respondio: “Si.  Puede ser ke vuestro Primo Ministro mos puede ayudar por mi ijo, en presionando Hamas.”
 
Komo ya savemos, el Primo Ministro turko, Recep Tayyip Erdogan, despues del akontesimiento del 31 Mayo kon la flotilla (ver mi ultimo eskrito en eSefarad) se izo un eroe grande en Gaza, i muy amado por Hamas.   Si Erdogan kere azer un akto verdadmente umanitario, ke aga lo ke le propozo el Sr. Shalit!!! 

“Muestro korason esta despartido en dos”

Ansi esta titulado el ultimo paragrafo del eskrito.  Avla de “viejos amigos”, los Turkanos ke estan ayi kon pankartas, de los miembros de la Union de Emigrantes de Turkia i su presidente, Momo Uzsinay.  Konta ke ay unos 100,000 emigrantes de Turkia en Israel.  Dizen: “Muestro korason esta despartido en dos.  Turkia es muestro pais.  Ayi ermaos djudios, aki semos turkos. Estamos muy triste por lo ke paso.  Lo ke logrimos tanto para estableser [amistad entre Turkia I Israel] se destruyo en un momento.” 

I despues, en la kava fraza, meldamos ke la Itahdut , la Union de Turkanos, mando una letra a Kizilay (Luna Kolorada, el ekivalente turko de la Cruz Roja/Red Cross) rogando ke se entremeta por Gilat Shalit.  La letra se fue el viernes pasado, i estan esperando repuesta.

Asegun mi, esto era el mas emportante haber!  Koza ke devia sido komunikado a toda la prensa mundial.   Ma yo no lo avia visto ni sentido esto en dingun lugar!

Le demandi a mi ermano Selim si era verdad.  Me disho si, i me mando el teksto de la letra.

Letra de la Itahdut para Kizilay (Luna Kolorada)

El teksto de la letra, en turko siguro, se topa tambien en el sitio de la Itahdut.  

Mos podemos solo imajinar las maraviyozas konsekuensas de una repuesta pozitiva a esta letra. Vos do aki mi traduksion:

Onoravle Tekin Küçükali
Presidente Jeneral de Kizilay, Turkia
Ankara

 2 djulio 2010 

Onoravle Presidente, 

Despues de avlar por telefon oy kon el onoravle Deniz Shölen de vuestra organizasion, vos eskrivimos para demandar vuestro ayudo a rezolver un problema umanitario.

Komo ya savesh, djusto 4 anyos atras, un djoven soldado Israeliano, GILAD SH?AL?T, fue sekuestrado de tierras Israelianas por miembros de Hamas i emprezado en Gaza.  Durante estos 4 anyos, munchas personas de estado perkuraron a ayudar sin dingun rezultado, i no solo ke este soldado no fue salvado, ma dinguna organizasion sivil de derechos umanos no fue permetida de vijitarlo.

Vozotros tambien konosesh la ley i akordo enternasional ke da el derecho a kada prizoniero de ser vijitado por organizasiones komo Kizilay (Luna Kolorada) i Kruza Kolorada.  Es klaro ke el enyegar este derecho de Gilad Shalit es enyegarle un basiko derecho umano.

El padre i la madre de este djoven soldado estan en grande angusia.  No tienen dinguna enformasion sovre el estado de salud de sus ijo.

Estimado Presidente,

Muestra Asosiasion sige los uzos i kostumbres turkos en este pais,  lavora para dar a konoser la Turkia al puevlo Israeli en la mijor manera posible, i kontinuamente ayuda a mantener relasiones amistozas.  La mediasion en el kavzo mensionado de una organizasion turka komo el Kizilay naturalmente mos dara grande orgulyo. 

Si Kizilay , kon su buena fama muy meresida, reushe a vijitar Gilad Shalit, no ay duda ke kreara una sensasion mundial, i puede ser dara un grande paso para traer fin a los dezakordos en esta rejion, i lo mas emportante, realizara un akto umanitario.

Kon agradesimiento i ogurios de reushita, vos mandamos muestros profundos respektos.

UNION DE TURKANOS EN ISRAEL

 
Grasias a Selim Salti por las fotos ke me mando.