eSefarad Noticias del Mundo Sefaradi
Ver todos los artículos de esta sección >>
_________________________________________________________
La poezia «Rodis vestida de luto»
Munchos de muestros amigos, orijinarios de Rodes o de famiyas Rodeslis, konosen al senyor Isaac Habib, kompozitor de la sigyente muy emosionante poezia.
Me la mando mi amiga Veronique Jonas (tambien de famiya Rodesli) a la kuala la rengrasyo. Me disho ke esta poezia fue meldada en la seremonia de komemorasion de la Shoa en Capetown.
Yo deshi la ortografia i otros “kastelyanismos” asegun lo eskrivio el sinyor Habib.
Rachel
—
Rodis vestida de luto, 70 años.
Por estos caminos estretchos camino,
Por Rodis la hermoza bushco y bushco.
Por la Djudería muerta, vo y vengo,
Casas vacillas, descallidas, veygo.
Caras felices me arodean,
Pero estas caras no son las de mi puevlo.
El Alemàn a Rodis la tomó,
Y en un día, a los hijos de Abraham, se los llevó
Aquel día, mi Djudería se murió.
Desde entonces, Rodis la mia,
De luto, siempre, està vestida.
Setenta años ya pasarón
Cuando los Rodislis, en Auschwitz, entraron.
Auschwitz! Residencia de la muerte.
Setenta años despues, en Auschwitz, yo entré,
En los pasos de los que sufrieron, yo pesé.
El cielo estavà color de ceniza.
Querría llorar, amà, no pude.
La nuvlina emburajàva la grandeza
De este lugar triste y sin àlma
De ande chimineyas altas escupieron
Dumàn etcho de carne y güeso.
El día diez y sesh de agosto del 1944,
Mil novecientos Rodislis se hizieron dumàn.
Seshentos, aterrorisados, arapados,
Flacos, tatuados,
Miradas pedridas,
Ujeras oscuras,
En este enfierno sufrieron.
Poco màs de cién se salvaron.
Hoy, apenas, un puñado queda.
En Auschwitz, Bergen Belsen,
Terezin o Mathausen,
En Rodis, Cos o Salonika,
Siento a todos,
Djudios o no Djudios,
Siento sus murmuros:
«Qué pisesh en muestros pasos!
Aquí, siempre, mos quedaremos!
Invisibles, indiscernables, impalpables!
Es que somos los fantasmas llendo y viniendo
De estos campos malditchos ?
Es que somos condenados en quedar aquí ?
Muestras caras, màs, no tienen rasgos!
No tenemos mortajas ni tumbas.
Somos dumàn, ceniza en tierra etchada.
Es que somos la fruta de la bestialidad humana ?
Como el humo despareciendose en el aire,
Como las olas etchandose en la arena,
Como el sol escondiendose en el horizonte,
Como la flama en punto de amatarse,
Como un livro que bién presto se serrarà,
La Shoah, sin sus sobrevivientes,
Entrarà, no en todos, los livros de historia.
En memoria de las víctimas
Que calleron en las manos del mal.
En memoria de la que llevava,
Tatuado, el número A 24287.
Isaac Habib.
______________________________________________________________
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.
