En vista de Rachel: Estorya de un Milagro – Un Ijo Presyado ke dio Vida a su Padre

En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros kada mes sus komentarios sovre distintos butos.

Ver todos los artículos de esta sección >>

Estorya de un Milagro
Un Ijo Presyado  ke dio Vida a su Padre

Despues de ser diagnostikado kon siroz (cirosis) 5 anyos atras, Yako Abolafya, Izmirli, esta rebivo oy grasias a una operasion ke le transplanto el igado de su ijo.  Su malatiya se avia engravesido en supito i se asperava ke Yako Abolafya, aedado de 61 anyos,  se iva murir en kurto tiempo.  Agora los doktores estan diziendo ke lo ke paso fue un milagro.

El siroz de Abolafya era una hazinura rara relasionada kon el diabet, i en el mez de febrero pasado el se izo malo demuevo, i fue yevado al ospital. Los tratamientos ke resivio no le izieron provecho, i los doktores desidaron ke el solo remedyo era transplantarle un igado. Ma, los operatores del Sentro de Transplantasion de Organos de la Universidad Ege vieron ke la arteria prinsipal ke mantiene el igado estava obstruida (clogged), i en este estado refuzaron de azer la operasion. Adientro de un mez, el estado del hazino se izo muy grave, empeso a pedrer konosimiento, i su igado se dezizo kompletamente. Entonses, dos Profesores Gastroentorologos de la Universidad Ege – Prof. Dr. Salih Ulus Akarca i Prof. Dr. Galip Ersöz – lo referieron al operator Dr. Murat K?l?ç i su ekipo del Sentro de Transplantasion de Igado del Ospital Munisipal (Kent Hastanesi Karaciger Organ Nakli Merkezi.)

De su ora se avia determinado ke el ijo Moris, de mezmo grupo de sangre, de edad de 30 anyos i de fuerte konstitusion, podia ser donor, ma Yako Abolafya no kijo meter a su ijo en rizgo.  La famiya tenia esperansa ke se iva topar un igado de algun kadaver (muerto.) Ma no avia tiempo de pedrer.  Kon kada ora ke pasava Yako se aserkava a su proopria muerte.  Su ijo Moris, ke lavorava en Estanbol, vino a Izmir pormodo los “tests”.   Los rezultados de los tests fueron buenos. Ma los doktores dizian ke achakes ke la arteria del hazino estava blokeada, i ke su igado estava en estado de koma, la operasion iva ser muy rizgoza, ke la shans de reushita era solo 50 por 100, i ke avia rizgos tambien en la perioda ke sige la operasion.

Ma, malgrado este “tableau” negativo,  Moris savia ke en su kuerpo el yevava el uniko organo ke podia darle la vida a su papa, i desido a ser donor.

El 21 Marso, 2013, por la manyana Yako Abolafya i su ijo Moris fueron tomados a la kamareta de operasion en el Ospital Munisipal (Kent Hastanesi.)  La operasion de Moris turo kuatro oras i medya, i la de Yako Abolafya turo ocho oras.

Y?ld?z Abolafya, ke mando a su marido i a su ijo a la operasion en el mizmo momento, deskrive este tiempo difisil:

“Fue una desizion muy difisil.  No uvo ni tiempo de pensar. Yo fui siempre una persona kreyente,  i por esto estava segura ke la operasion iva reushir. La operasion de Yako fue mas difisil de lo ke les avia paresido a los doktores. I la perioda de rekuperasion fue verdadmente muy difizil. Yo no me desparti del ospital en todo este tiempo.  A Moris le tomaron el 70 por sien del igado, i paso dias angusyozos despues de la operasion.  Esto era normal, ma yene (aun kon esto) estava merekiyoza (prekokupada.) El es una persona fuerte i sensivle. Aze lo todo por su famiya.  I mis dos ijos son ansina.  Kuando Moris salyo del ospital, fue Selim i Rachel Abolafya ke se kargaron de su kudio – por lo kualo no los puedo rengrasiar bastante.  Noche de Pesah tuvimos una sorpreza ermoza. Mi marido fue kitado de kudio intensivo, i enprimero kijo ver al ijo ke le salvo la vida.  Palavras no abastan a deskrivir la emosion del momento enke padre i ijo se abrasaron.  Despues de este milagro ke tuvimos, me se enfuertesio la fe en el Dio.  Tambien me siento muy agradesida al  Dr. Murat K?l?ç i su ekipo por sus grande devosion i reushita.”

Aktualmente Yako Abolafya esta pasando su periodo de rekuperasion i terapia en su propria kaza, i Moris esta avagar avagar aboltado a su salud i fuersa en la kaza de su padre. Se espera ke adientro de tres mezes su igado se renovara i kresera asta su boy (tamanyo) de antes.

Moris, ke dio la vida a su padre kon devosion i kerensia eksepsional, ekspresa sus sentimientos kon grande umilidad:

“Me dizen ke todos no arian lo ke ize yo. Ma yo no kreygo esto. A mi me parese muy natural lo ke ize.  Kuando me disheron ke mi padre iva murir despues de dos dias, yo estava pronto a azer lo ke era menester para alargar su vida.

Pensi ke los efetos de la operasion mia no podian ser komparados kon la pena ke iva sintir si pedria a mi papa. En este momento, mi papa se esta mijoreando avagar avagar, ‘kon suvidas i abashadas’ komo dizen.   Despues de sesh mezes vamos a saver si el organo transplantado se adapto al kuerpo muevo. Ishallah ke todo va ser bien i ke lo ke sufrieron mi mama i mi ermaniko Sami va valer la pena. El ke sufrio menos de todos so yo.  Yo entri a la operasion i sali.  Todos vamos estar mas orozos kuando mi padre va ayegar a su buena salud.” 

Y?ld?z Abolafya, ke paso un egzamen duro komo espoza i madre en este periodo difisil de la famiya aunada para salvar la vida de Yako Abolafya, da sinyifikasion a lo ke izo su ijo Moris kon los biervos sigyentes:

“Moris tomo un rizgo grande.  Su vida entera el va yevar la sikatriz de la operasion komo un sinyal de este sakrifisyo suyo.”

Kon la esperansa de tomar haberes de buena salud de la famiya Abolafya, les oguramos “Refua Shelema”  Amen!..

Sarit Bonfil – Izmir
Traduizido por: Rachel Amado-Bortnick
Dallas – Texas
Fondadora de Ladinokomunita