eSefarad Noticias del Mundo Sefaradi
Ver todos los artículos de esta sección >>
El armistisyo de Lausanne, 1923, i el Rav Haim Nahum
Keridos amigos,
Ayer 24 Julio, fue el aniversaryo de 91 anyos del armistisyo de Lausanne, ke rekonosyo la Republika Turka, despues ke kayo el Imperio Otomano (1299-1919.) En este armistisyo, i en el movimiento Kemalisto (de Ataturk) para la independensia turka, tuvo grande rolo el Gran Rabino Haim Nahum.
Depues de la Primera Gerra Mondial el Imperio Otomano tuvo su fin, i el sultan (ansi ke el puevlo de la Turkia) kedo debasho la dominion de la Inglitera, Fransia, i Rusia. En el armistisio de Sevres (Augusto 1920) munchas nasiones sinyaron la fin de la independensia turka, i trato de dar Istanbul a la Inglitera, la rejion del Ege en Anatolia a la Gresia, la rejion mediteranea a la Italia, la rejion del este a la Rusia, i mas . Kuando los inglezes okuparon Istanbul en Marso de 1920, el Rav Haim Nahum renunsio su posto komo Gran Rabino.
De 1919 asta 1923 tuvo lugar la Gerra de Independensia turka debasho el lider Mustafa Kemal (despues yamado Atatürk), ke vensio en primero a los rusos i armenos en el este, i despues los gregos en el ueste. Solo lngliterra se travo sin gerrear.
El armistisio de Lausanne se sinyo el 24 Julio 1923 despues de 8 mezes de negosiasiones. Haim Nahum fue el konsejero a Ismet Inönü (amigo de Atatürk, i fue prezitente de la Republika despues de la muerte de Atatürk), ke enkavesava la delegasion turka. El se topava tambien djuntos kon Inönü en la delegasion turka en Lausanne kuando empesaron las negosiasiones (Novembre 1922) i tambien en Avril, 1923). La prensa franseza publiko muncho sovre los esforsos del rabino Nahum.
Finalmente Inglitiera, Fransia, Italia, Japon, Gresia, Romania, i Slovenia sinyaron el armistisyo ke rekonosio la Turkia komo muevo estado libre, i tres mezes despues, en el 29 Oktobre 1923 se deklaro la Republika Turka.
En 1925 Haim Nahum paso a su muevo posto komo Gran Rabino del Ejipto. Ayi se topava kuando se establesio el Estado de Israel, i durante lagerra del Suez en 1956. Fue mas ke un gran rabino, fue politiko i diplomado, ko-fondador de la Academie Royale de Langue Arabe, eskritor, i traduktor. Dirijo la komunidad djudia del Ejipto durante el nasionalismo de Nasser i la emigrasion masiva de los djudios de Ejipto. Murio en Kairo en 1960. Su neshama ke biva por siempre.
(La mas importante referensia Bibliografika es el livro editado de Ester Benbassa, traduksion del fransez de Miriam Kohan: Haim Nahum: A Sephardic Chief Rabbi in Politics 1892-1923.)
Rachel Amado Bortnick
Dallas, Texas
Ladinokomunita
En esta seksion “En vista de Rachel”, Rachel Amado Bortnick, fundadora de Ladinokomunita, un foro en Internet para korrespondensia solo en djudeo-espanyol, va a partajar kon mozotros sus komentarios sovre distintos butos.
