eSefarad Noticias del Mundo Sefaradi
Ver todos los artículos de esta sección >>
Esta semana la selebrasyon de “Tu b’Av” (el 15 del mez de Av) komo fiesta del “Dia de Amor” kaye al mierkoles, el 5 augusto, i por esto mis pensamientos van al konsepto de amor en muestra kultura i lingua sefaradi.
Ya savemos ke en los tiempos de muestros padres (diremos asta los medyanos del sieglo 20) en las komunidades sefaradis, las estoryas de amor se topavan jeneralmente solo en romansas, kantikas i novelas. En realidad, las ijikas no tenian opsion de konoser mansevikos, ni de eskojer sus espozos. Los kazamientos se azian solo despues ke las famiyas de las dos partes kedavan de akordo por la dota, meza franka, y otros detalios de mezos de mantenimiento. La kestyon de amor no era una de estas kondisiones, porke se kreiya ke la amista iva vinir kon tiempo, despues del kazamiento, asegun avia dicho Tevye en la pyesa del “Violonisto en el Tejado.”
Ma este sistem i este pensamiento se troko kon el tiempo. Agora vemos ke los mansevos “enamorados” biven en djuntos mezmo sin kazarsen, o se kazan despues de un sierto tiempo, i munchas vezes se kitan poko despues de kazarsen. Ma kreygo ke los ke kedan kazados por munchos anyos, i asta la fin de sus vidas, son los ke se ambezaron la sinyifikasyon del verdadero amor.
Ke sinyifika el verdadero amor? Es ke ay amor falso?
La repuesta la puede dar solo el ladino, muestra lingua djudia-espanyola! El amor verdadero no se yama amor, se yama “kerer bien.” Ni “amor” ni “enamorarse” tienen la fuersa o la ondura del sentimiento ke tiene el “kerer bien.” Kualo diziamos a muestra madre kuando la abrasavamos? “Te kero muncho bien!” Un kuple de enamorados deven embezarsen a kerersen bien. Si no, el “amor” no tiene dinguna valor.
En inglez se uza “love” por aki por aya! Si le agrada sosis, el amerikano va dizir “I love hot dogs!”, i a la madre le va dizir “I love you.” La kerensia al hot dog i a la madre es la mizma? En muestra lengua, dizimos ke mos agrada o mos plaze alguna komida, alguna kolor, algun lugar o alguna aktividad komo ir al sinema (komo lo aziamos antes de la pandemia; vos akodrash?) I si una koza o una persona mos agrada muy mucho, podemos dizir “m’enamoro” de akeya koza o persona. Ma de vista entendemos ke este “amor” es sentimiento superfisyal i pasajero. Solo el kerer bien es un sentimiento profundo i permanente.
Kerer bien a una persona, kerer bien a la umanidad, kerer bien a la natura. Si analizamos esto biervo entendemos komo de profundo es este konsepto. Lo ke keremos, lo ke dezeamos, es solo lo bien, nunka lo mal!
Dizen ke el amor es siego. Ma el kerer bien es koza ke se aze kon los ojos aviertos.
Tu beAv alegre a todos.
—————-
Rachel Amado Bortnick – Dallas
Fuente: turkisrael.org.il
